जेष्ठ नागरिक र सुत्केरीहरूलाई सम्मान

रानिपौवा/ककनी गाउँपालिकाले जेष्ठ नागरिक र सुत्केरीको सम्मान गरेको छ । गाउँपालिकाको अध्यक्ष मानबहादुर लामा, उपाध्यक्ष सिता लामा खतिवडा, प्रमुख प्रशासकीय अधिकृत टुनाबहादुर श्रेष्ठ सहितको टोलीले वडा नं. ६ र ७ का ९० वर्ष उमेर पूरा भएका जेष्ठ नागरिकलाई र स्वास्थ्य संस्थामा सुत्केरी भएकाहरूलाई भेटर सम्मान तथा प्रोत्साहन दिएका हुन् ।
वडा नम्वर ६ को क्यौरिनीस्थित नवजीवन माविमा आयोजित कार्यक्रममा उक्त वडाका ९० बर्ष माथिका ९ जना ज्येष्ठ नागरिकहरूलाई जनही दुई हजार रुपैयाँ नगद सहित दोसल्ला र प्रमाणपत्रबाट सम्मान गरे भने न्यानो कपडा समेत बितरण भएको छ । वडा नम्वर ७ को चतुरालेस्थित महेन्द्र माविमा आयोजित कार्यक्रममा उक्त वडाका ४ जना ज्येष्ठ नागरिक र ८ जना सुत्केरीहरूलाई पोषिलो झोला बितरण भएको छ ।