२०७६ माघ ६ गतेको सम्पादकिय

पहिचानमा केन्द्रित गरौं
नुवाकोट उद्योग बाणिज्य संघले आयोजना गरेको नुवाकोट महोत्सवको छौठौ संस्करण प्रस्तुत भइरहेको छ । जिल्लाको तमाम् सम्भावना र अवसरलाई प्रस्तुत गर्ने साझा र खुल्ला मञ्चको रुपमा महोत्सवलाई संघले प्रत्येक पटक प्रयोग गर्ने प्रयास गर्दैछ । सुरु सुरुका महोत्सवहरूमा नागरिकहरूको र आयोजकको पनि उत्साह त्यसैपनि भरिदै आएको थियो । अब अवस्था फेरिएको छ । परिस्थिति र नागरिकहरूको अपेक्षा बदलिएसंगै महोत्सव पनि बदलिनु पर्ने छ । तेश्रो÷ चौथोे महोत्सवसम्म मनोरञ्जनको लागि मात्रै पनि नागरिकहरू महोत्सवको प्रतीक्षामा रहने गरेका वा नुवाकोट महोत्सवलाई प्रयोग गर्ने गरेका थिए । अहिले ग्रामिण भेगमा समेत बढ्दो ईन्टरनेटको प्रयोगले मनोरञ्जनका लागि वा प्रतिष्ठित कलाकारको अनुहार नजिकैबाट हेर्नका लागि महोत्सवमा गइरहनुपर्ने अवस्था कसैमा पनि छैन । हातहातमा भएको एनरोइड मोवाइलले नै आम दर्शकहरूलाई त्यस्ता रहर केही हदसम्म मेटाएको छ ।
अघिल्लो नुवाकोट महोत्सवमा सहभागि दर्शकहरूकै अपेक्षामा ठूलो बदलाव आएको थियो । तीन वर्ष अघिको महोत्सवमा सहभागि भएकाहरूले जिल्लाको पहिचान, कला संस्कृति, परम्परा तथा जिल्लाको मुलभुत पक्षलाई स्टलमा बढी खोजेका थिए । नकि, राष्ट्रिय कलाकारहरूको प्रस्तुती, बहुराष्ट्रिय कम्पनीका सामाग्रीले भरिएका स्टलहरू । तीन वर्ष पछिको समयमा झन् नागरिकहरूको अपेक्षा महोत्सव प्रति बिल्कुलै फरक भएको हुनुपर्छ । परम्परागत कुरा, नुवाकोटको भनेर गर्व गर्न सकिने भौतिक तथा अभौतिक पक्षको प्रस्तुति महोत्सवमा दर्शकहरूले खोजिरहेका छन् । अथवा तीन वर्ष अघि भन्दा बढी अबको दर्शकहरूले त्यस्ता कुराहरूको खोजी गर्नेछन् । त्यसैले पनि नुवाकोट उद्योग बाणिज्य संघले छैठौं नुवाकोट महोत्सवलाई विशेष र एउटा उदाहरणिय महोत्सवको रुपमा पेश गर्नु जरुरी छ । त्यसका लागि जिल्लाको पहिचान बोकेका कला, संस्कृति, जनजीवन, भेषभुषा, ऐतिहासिक पक्षहरूलाई बढि प्रस्तुत गर्नुपर्ने देखिएको छ । त्यसो नहुँदा नुवाकोट उद्योग बाणिज्य संघ जस्तो सयौं सदस्य (झण्डै तीन हजार) रहेको छाता संस्था र आधा दर्जन महोत्सव गरिसेकको अनुभवी संस्थाको ब्यानरमा भएको महोत्सवमा र अन्य कुनै एएटा क्लवले गर्ने महोत्सवमा खासै भिन्नता नरहन सक्छ । छैठौं नुवाकोट महोत्सवलाई नुवाकोटको गरिमा, इतिहास, संस्कृति र जनजीवन प्रस्तुत गर्न तर्फ केन्द्रित गरौं ।