पृथ्वी माविले स्मरण गर्यो योगदानकर्तालाई

सम्मान प्रदान गर्दै नेता केसी । साथमा विदुर नपाका उपप्रमुख दाहाल 

विदुर\नुवाकोटको उत्कृष्ट सामुदायिक विद्यालय पृथ्वी माविले गएको आइतवार ४५ औं बार्षिकोत्सव मनाएको छ । पछिल्लो केही वर्षदेखि नुवाकोट जिल्लामा उत्कृष्ठ नतिजा प्राप्त गर्दै आएको पृथ्वी माविलाई नमूना विद्यालयको रुपमा चर्चा गरिदै आएको छ । उक्त विद्यालयले आफ्नो ४५ औं बार्षिकोत्सवको अवसरमा विद्यालयमा विभिन्न समयमा योगदान प्रदान गर्ने व्यक्तिहरूको सम्मान गरेको छ ।

नुवाकोटको विदुरमा रहेको पृथ्वी माध्यामिक विद्यालयको ४५ औँ वार्षिक उत्सव कार्यक्रलाई सम्वोधन गर्दै नेता केसीले टुक्राटुक्रा राज्यमा विभाजित भएको नेपाललाई एकतामा बाध्न सफल व्यक्तित्वको रुपमा पृथ्वीनारायणलाई चिनिने भएकोले आधुनिकता, परिवर्तन र क्रान्तिको नाममा राज्यले बिर्सन नहुने उनले बताए ।

घुस लिने र दिने दुवै राष्ट्रको शत्रु हुन् भनिएता पनि संघिय सरकारदेखि स्थानीय तहको वडा तहले भष्ट्राचारलाई प्राथमिता दिइरहेको नेता केसीको आरोप छ । यस्तै, भक्तजनहरू जुत्ताचप्पल निकालेर जसरी मन्दिरभित्र प्रवेश गर्छन् उसैगरी विद्यालयको हाताभित्र राजनैतिक गन्धलाई भित्र्याउन नहुने नेता केसीको भनाई छ ।

नेपाली काँग्रेस नुवाकोट सभापति जगदिश्वर नरसिंह केसीले सामुदायिक बिद्यालय मध्ये पृथ्वी माबि नुवाकोटकै उत्कृष्ट बिद्यालय रहेको बताए । जिल्लाकै उत्कृष्ट  सामुदायिक बिद्यालयको रुपमा रहेको पृथ्वी माध्यामिक बिद्यालयमा राजनीति गर्नेहरू बाहिरि रुपमा सलबलाउन थालेको आरोप लगाए

विदुर नगरपालिकाका वडा नं. ४ का अध्यक्ष एवं नगरपालिकाका प्रवक्ता टलकमान श्रेष्ठले पृथ्वी माविले प्राप्त गरेको उपलब्धिले साुमदाियक विद्यालयहरुको शिक्षामा नागरिकको भरोसा जागेको बताए ।

कार्यक्रममा बिद्यालय ब्यबस्थापन समितिका अध्यक्ष हरिकृष्ण श्रेष्ठले विद्यालयले नुवाकोट जिल्लामा नै हरेक बर्ष उत्कृष्ट नतिजा निकाल्दै आएको स्मरण गरे । साथै बिद्यालयको बिकास र गुणस्तरिय शिक्षा प्रबाह गर्न आफुहरू अझै प्रयत्नशिल रहेको उनले बताए ।

पुर्व प्रधानाध्यपाक, पुर्व विद्यालय व्यवस्थापन समितिका अध्यक्ष, उत्कृष्ठ शिक्षक तथा कर्मचारीहरूलाई सम्मान गरेर योगदानको स्मरण र चर्चा गरेको छ । एक दशक अघिसम्म विद्यार्थी भेट्टाउन मुस्किल गर्ने गरेको उक्त विद्यालयमा अहिले भर्ना पाउनका लागि विद्यार्थीहरूले पुर्व परीक्षा दिनुपर्ने अवस्था सृजना भएको छ । शैक्षिक गुणस्तर, राम्रो व्यवस्थापनका कारण पृथ्वी माविले जिल्लाको शिक्षा क्षेत्रमा नमूना विद्यालयको रुपमा नाम दर्ज गराएको छ ।

विद्यालय यहाँ  आइपुग्नका लागि आ–आफ्नो क्षेत्र र आ–आफ्नो समयमा योगदना र सहयोग गर्ने व्यक्तिहरूको सम्मानमा यसपालिको बाषिर्कोत्सवलाई सदुपयोग गरेको विद्यालयका प्रधानाध्यापक बाबुराम लामिछानेले इमेज साप्ताहिकलाई बताए ।