जेष्ठ नागरिकको उपचार घरघरमै

विदुर\विदुर नगरपालिकाले ज्येष्ठ नागरिकहरूको सम्मानमा स्वास्थ्य परिक्षण घरघरमै पुगेर गर्न थालेको छ । यो अभियानको शुक्रवार औपचारिक रुपमा नगरपालिकाका प्रमुख सञ्जु पण्डितले गरेका छन् । उनले त्यस अवसरमा नगरवासीलाई सम्वोध गर्दै सबै ज्येष्ठ नागरिकलाई  स्वास्थ्य सेवाको पँहुचमा ल्याउनको लागी अभियान सुरु गरेको बताए ।
विदुर नगरपालिका वडा नम्बर ८ को भैरमकोटमा सेवाको सुभारम्भ गर्दै नगर प्रमुख पण्डितले स्वास्थ्य संस्थाको पँहुचमा भएपनि परिक्षण गर्ने बानीको बिकासको जरुररी रहेकोले अभियान आवश्यक रहेको उल्लेख गरे । उनका अनुसार विदुर नगरपालिकाको १३ वटै वडामा ज्येष्ठ नागरिकको प्रत्येक ३÷३ महिनामा घरघरमै पुगेर स्वास्थ्य परिक्षण गरिनेछ । अभियान सुरुवातमा नपाका उपप्रमुख गिताकुमारी दाहालले ज्येष्ठ नागरिक जिवन्त ईतिहास र साक्षी रहेकोले उनीहरूको सम्मान स्वरुप निःशुल्क स्वास्थ्य परिक्षण अभियान सञ्चालन गरेको बताए । नगरपालिकाले नीतिगत रुपमै सबै नागरिकहरूलाई स्वास्थ्य सेवाको पँहुचमा ल्याउन अभियान सफल हुने बताए ।
कार्यक्रममा विदुर नगरपालिका वडा नम्बर ८ का अध्यक्ष फैसिङ तामाङले आफ्नो वडामा स्वास्थ्य केन्द्र तथा शहरी स्वास्थ्य क्लिनिक नभएको र यस्ता निःशुल्क स्वास्थ्य परिक्षण अभियानले नागरिकहरूले राहत महशुस गरेको बताए । विदुर नपाले सामाजिक सुरक्षा भक्ता लिने सबै ज्येष्ठ नागरिकको सहजताको लागी  घरघरमा स्वास्थ्य परिक्षण र निःशुल्क औषधि बितरण गरेको हो ।