२०७६ फागुन २६ गतेको सम्पादकीय

खाद्यान्न भण्डारण नगरौं

विश्वव्यापी रुपमा फैलिएको कोराना भाइरसको त्रासले स्थानीय स्तरमा नागरिकहरूको स्वास्थ्य संकटमा पर्ने अनुमान छ छदैनै छ । त्यो भन्दा पहिला दैनिक जनजीवन र अर्थतन्त्रलाई सिधासिधा प्रभाव पार्न थालेको देखिएको छ । विशेष गरी दैनिक उपभोग्य बस्तु र चीनबाट नेपाल आयात हुने कपडा तथा इलेक्ट्रिक सामानहरूको अभाव र मनमौजी बजार भाउ देखापर्न थालिसकेको छ । कोरानोले उत्पातै गर्ने नागरिकहरूको बढिनै त्रासदिपूर्ण सोचाईका कारण बजारले उपभोक्ताको माग अनुसारको सामान  दिननसक्ने अवस्थाको सृजना भएको छ । नुन, तेल, मसला, दाल, चामल, पिठो, एलपी ग्यास जस्ता उपभोग्य र दैनिन्दिय आवश्यक सामाग्रीहरू नागरिकहरूले बढिनै जम्मा गर्न थालेपछि त्यसको असर बढि देखिन थालेको हो ।

सरकारले मानिसहरू भेला हुने, सभा सम्मेलन गर्ने कुराहरूका नियन्त्रण गर्न आग्रह गर्यो, विद्यालयहरूलाई आफ्नो नियमित शैक्षिक गतिविधिहरूलाई छोट्याएर वा छिट्टै सकेर चैत ६ गतेदेखि विद्यालय बन्द गर्न नै उर्दी जारी गर्यो । जसले गर्दा अब चाँहि संकटनै आउन लागेको  भन्ने बुझाई आम नागरिकहरूमा परेको छ । जुन गलत हो । संक्रमण नफैलनका लागि पुर्वसावधानी अपनाईएको यो अभियानलाई ठूलै विपत्ति आउन लागेको जसरी नागरिकहरूले बुझ्ने गलत छ । एकै घरपरिवारले महिनौंसम्म पुग्ने सामाग्रीहरू भण्डारण गरे राख्न थालेपछि सामाग्रीको अभाव हुनु स्वाभाविकै हो । र त्यस्तो माग धेरै भएको मौकामा गलत मनसाय भएका केही व्यापारीहरूले सामान लुकाउने वा भाउमा कालोबजारी गराउने खतरा उत्तिनै रहन्छ । त्यसैले सावधान अपनाउनका लागि सरकारले गरेको आग्रहलाई संकटको अवस्थाको रुपमा बुझेर आवश्यकता भन्दा बढी सामाग्रीहरूको भण्डारण नगरौं । बजारमा भएका उपभोग्य सामान सबैले बरोवरी रुपमा निरन्तर पाइराख्ने अवस्थाको सृजना उपभोक्ता वा सचेत नागरिकहरू स्वंयम्ले गरौं ।