दृष्टिबिहिनलाई घरमै नागरिकता

विदुर\जिल्ला प्रशासन कार्यालय नुवाकोटले एक जना दृष्टिबिहिन घरमै पुगेर नागरिकता दिएको छ । घरमै नागरिकता वितरण भएको नुवाकोटमा यो पहिलो घटना हो ।
प्रशासकीय अधिकृत जनक रेग्मी र खरिदार राजु श्रेष्ठले अपांगता भएका विदुर नगरपालिका ११ चालिसे टोलका १७ वर्षीय कृष्णप्रसाद चालिसेलाई गएको सोमबार घरमै नागरिकता प्रदान गरेका हुन् । हिँड्डुल गर्न नसक्ने र दृष्टिविहीन कृष्णप्रसादलाई बोकेर विदुर ल्याउनु भन्दा घरमै नागरिकता पठाउनु सजिलो भएकाले यसो गरिएको कार्यालयले जनाएको छ ।
प्रमुख जिल्ला अधिकारी द्रोण पोखरेलका अनुसार उनलाई नागरिकता दिनका लागि पुरा गर्नु पर्ने सरकारी प्रक्रियाका लागि आवश्यक कर्मचारी र कागजपत्र घरमा पठाइएको थियो ।