पैसा नहुनेको चर्चा हुँदैन : उप सभापति थापा

विदुर । नेपाली काँग्रेस नुवाकोटका उपसभापति राजु थापाले पैसा नहुनेहरूको आफ्नो पार्टीमा चर्चा नहुने भन्दै वित्रिष्णा ब्यक्त गरेका छन् । पैसा भएका नेताहरूको मात्रै चुनावमा उम्मेदवार बन्नेमा नाम आउने र चर्चा हुने भन्दै राजनीति आर्थिक हैसियतसंग तौलिने परम्परा संस्थागत भएको बताएका छन् । 

बुधबार विदुरमा आयोजित निर्वाचन आचारसंहिताको प्रभावकारिता कार्यन्वयन र सरोकारवालाहरूको भूमिकासम्बन्धी राजनीतिक दलहरूसँगको अन्तरक्रियामा उनले सो कुरा बताएका हुन् । मतदाताहरूले पनि पैसा लिएर मात्रै भोट हाल्ने गरेकोले आफु जस्ता पैसा नभएका नेताको कुनै सम्भावना नभएको उनले बताए । ‘मसंग पैसा पनि छैन, उम्मेदवार हुनेको चर्चामा मेरो नाम पनि छैन’ थापाले भने । 

नुवाकोटका राजनीतिमा धेरै नेताहरू गरिव भएकै कारण पछाडी परेको र निष्ठाले हार खाएको उनको भनाई रहेको छ । निर्वाएचन पछिल्लो समय खर्चिलो र भड्किलो बन्दै गएकोमा चिन्ता व्यक्त गर्दै एजेण्डा लिएर मतदातामा गएर मात्रै पनि जित्ने दिन कहिला आउला भनेर काँग्रेस उपसभापति थापाले प्रतिप्रश्न गरे ।