Sunday, April 17, 2022

ओलीले भने : जुन सिङ आएपनि मतलव छैन

बट्टार । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले नुवाकोट जिल्लालाई एमालेको किल्ला बनाउने दाबी गरेका छन् । एमाले जिल्ला कमिटीले शुक्रबार गरेको सभामा बोल्दै अध्यक्ष ओलीले नुवाकोटलाई एमालेमय बनाउने दावी समेत गरेका छन् । 

‘नुवाकोट जिल्ला एमालेको किल्ला । नुवाकोट जिल्ला लालकिल्ला, नुवाकोट जिल्ला सूर्यको किल्लाको कुरा लिएर तपाईंहरू अगाडि बढ्नुहुनेछ,’ अध्यक्ष ओलीले कार्यकर्तालाई भने । नेपाली कांग्रेसका नेताहरू रामशरण महत, प्रकाशशरण महत, अर्जननरसिंह केसीलाई लक्षित गर्दै ओलीले भने,‘जो सुकै शरण आउन् । यो शरण आउन् कि अर्को शरण आउन् । दाइ शरण आउन् कि भाइ शरण आउन् । नरसिंह आउन् कि अर्का सिङ आउन् केही मतलब छैन ।’

उनले नुवाकोटमा एमालेले जित्न जरुरी रहेको बताउँदै ओलीले भने,‘को उम्मेदवार हुन्छ । त्यो छोड्नुस् । योग्य उम्मेदवार छान्नुस् । त्यसमा फित्ताले नाप्ने होइन् । ढकमा तौलिने होइन ।’ पार्टीले उम्मेदवार तोकिसकेपछि एकमत, एकसुरमा चुनावी अभियान अगाडि बढाउने र कार्यकर्तापंक्ति एक भएर लाग्नुपर्नेमा उनले जोड दिए । अहिले असन्तुष्टि पोख्ने बेला नभएको भन्दै ओलीले चित्त नबुझे बैशाख ३० पछि छलफल गर्नसमेत कार्यकर्तालाई आग्रह गरे । ‘चित्त नबुझेका कुरा वैशाख ३० गतेपछि जेठ ४÷५ गतेतिर बसेर कहाँ चित्त बुझेन, कहाँ के भयो भनेर छलफल गरिनेछ,’ उनले भने, ‘अरु ठाउँ पनि हुन्छन् । यो निर्वाचन जित्नै पर्छ ।

एमालेलाई हराउन गठबन्धनका नाममा ठूलो षड्यन्त्र र ठूलो साँठगाँठ भइरहेको ओलीको दाबी छ । ‘एमालेले देशभरीका ७ सय ५३ वटै पालिकाहरूमा जित्नुपर्ने छ,’ उनले भने, ‘एमालेलाई जित्न नदिनका लागि घोषित रुपमा, अघोषित रुपमा गठबन्धन हुँदैछ ।’ आफ्नै गृह जिल्लामा पनि एमालेलाई हराउन गठबन्धनका दलले ‘राजावादी पार्टी’ लाई सघाउन लागेको उनको दाबी छ ।

‘मेरै निर्वाचन क्षेत्र, मेरै नगरपालिकामा राजावादी राप्रपाका उम्मेदवारलाई कांग्रेस, माओवादी लगायतका पार्टीले साझा उम्मेदवार बनाउँदैछन्,’ उनले भने, ‘अनि अस्ति एक जनाले भन्दै थिए, अब केपी ओली ज्ञानेन्द्र शाहसँग मिल्न जान्छ, राजावादीसँग मिल्न जान्छ । लाज हुनुपर्ने ! मेरै क्षेत्रमा साझा उम्मेदवार बनाउँदैछन् राजवादीलाई ।’

No comments:

Post a Comment