कविता

यात्रा

रामचन्द्र तिम्सिना(आवाज)

विगतको कथा र आगतको कल्पना

एकाकार हुँदोरहेछ कहिलेकाही !

लाग्छ अहिले 

वर्तमान ठिङ्ग उभिएर प्रश्न गर्दैछ 

कस्तो भयो तेरो सिङ्गो जीवनको यात्रा ?

बाको हात समातेर ताते गर्न सिकेको मान्छे

नातीको औंला समातेर उठ्न खोज्दैछ

यौनकर्मिको जिवनी जस्तो कथा

जवानी ठिङ्ग उभिएर प्रश्न गर्दैछ

कस्तो भयो तेरो सिङ्गो जवानीको यात्रा ?

सरकार अंगेनामा बसेर गफ हाँक्दैछ

नेता मञ्चमा बसेर भ्रम बाँढ्दैछ

कार्यकर्ता चौरमा बसेर थपडी मार्दैछ

भोगवादको रसस्वादनमा डुब्दैगर्दा

समाजवाद ठिङ्ग उभिएर प्रश्न गर्दैछ

कस्तो भयो तेरो सिङ्गो सत्तावादको यात्रा ?

लाम लागेर उभिएका सहिदका सालिकहरु

हतियार उठाउने र बिसाउने भ्रमवादका ठेलिहरु

सुनको बिस्तरामा अरवौंको लालपुर्जा सिरानी राखेर सुत्दै गर्दा

साम्यवाद ठिङ्ग उभिएर प्रश्न गर्दैछ

कस्तो भयो तेरो सिङ्गो क्रान्तिकारी यात्रा ?

ऋृण र अनुदानले देश बनाउने सपनाहरू 

आदर्श र भाषणले समृद्धि ल्याउने चाहनाहरु

लासको बाकसमा रेमिटान्सको गन्ध सुंघ्दै गर्दा

माओवाद ठिङ्ग उभिएर प्रश्न गर्दैछ

कमरेड कस्तो भयो तेरो सिङ्गो जनयुद्धको यात्रा ?

कस्तो भयो तेरो सिङ्गो जनयुद्धको यात्रा ?

– म्यागङ ५ सामरी, नुवाकोट