समुन्द्रादेवीमा प्रशुती सेवा सुरु

विदुर । शिवपुरी गाउँपालिका वडा नम्बर ६ मा रहेको समुन्द्रादेवी स्वास्थ्य चौकीमा प्रशुती सेवा सुरु भएको छ ।

समुदायमा अझै पनि घरैमा सुत्केरी हुने गरेको र आमा र बच्चाको स्वास्थ्यमा समस्या उत्पन्न भई ज्यान नै जोखिममा पर्ने गरेको पाइएकोले पालिकाले समुन्द्रादेवी स्वास्थ्य चौकीमा नै प्रशुती सेवा सुचारु गरेको बताइएको छ । वडामा रहेको स्वास्थ्य चौकीमा नै प्रसुति सेवा उपलव्ध भएसँगै सुत्केरी गराउन अन्य स्वास्थ्य सस्था धाउनुपर्ने बाध्यता हटेको स्वास्थ्य तथा सामाजिक विकास शाखा प्रमुख उद्धव कार्कीले बताएका छन् ।

समुन्द्रादेवी सहित शिवपुरीको ६ वटा स्वास्थ्य चौकीमा प्रशुती सेवा उपलव्ध रहेको छ । वडा नम्बर १ मा रहेको तलाखु स्वास्थ्य चौकी, वडा नम्बर ३ मा रहेको सल्लेमैदान स्वास्थ्य चौकी, वडा नम्बर ४ मा रहेको सिक्रे स्वास्थ्य चौकी, वडा नम्बर ७ मा रहेको सुनखानी स्वास्थ्य चौकी र वडा नम्बर ८ मा रहेको थानापती स्वास्थ्य चौकीमा यस अघि नै प्रशुती सेवा उपलव्ध रहेको थियो । 

आगामी आर्थिक वर्षमा वडा नम्बर ५ र २ मा रहेको स्वास्थ्य चौकीमा पनि प्रशुती सेवा उपलव्ध गराउने लक्ष्य राखिएको शविपुरी गाउँपालिकाका अध्यक्ष रामकृष्ण थापाले बताएका छन् । 

शिवपुरी गाउँपालिकाले स्वास्थ्य संस्थामा गई नियमित रुपमा गर्भजाँच गराएमा गर्भवतीले ४ क्रेट अण्डा, ४ प्याकेट आयोडिन नुन प्राप्त गर्नेछन् । त्यस्तै पहिलो पटकको गर्भ जाँचमा सय रुपैयाँको रिजार्च कार्ड समेत उपलव्ध गराउने गरिएको छ । स्वास्थ्य संस्थामा नै गई सुत्केरी गराउनलाई प्रोत्सहान गर्न गाउँपालिकाले ५ सय रुपैयाँ पोषण भत्तासँगै स्थानीय स्वास्थ्य सस्थामा सुत्केरी हुन नसकी अन्य अस्पतालमा जान परेमा पालिकाले निःशुल्क एम्बुलेन्सको समेत व्यवस्था गरेको गाउँपालिका उपाध्यक्ष मञ्जु केसीले बताए ।