विदुर । स्थानीय तह संस्थागत क्षमता स्वमूल्यांकन (लिजा) मा रसुवाको गोसाइँकुण्ड गाउँपालिका पहिलो बनेको छ ।
रसुवा जिल्लाको पाँचवटा गाउँपालिकामध्ये लिजामा गोसाइँकुण्ड गाउँपालिका पहिलो बनेको हो । आर्थिक वर्ष २०७७/७८ मा ६८.५७ अंक ल्याएर गाउँपालिका पहिलो बन्न सफल भएको हो । यो गाउँपालिकाको औसतमा ६८.७५ प्रतिशत अंक छ । यसमा समग्र स्थिति ७७.३८, प्रक्रियागत ६३.२४ र परिमाणात्मक ६८.८९ छ ।
लिजामा ६४.२५ अंक ल्याएर कालिका दोस्रो, ६१.७५ अंक ल्याएर नौकुण्ड तेस्रो र ६१.५ अंक ल्याएर उत्तरगया तेस्रो भएको छ । रसुवा जिल्लाको औसतमा ६४.०६ प्रतिशत अंक छ । यसमा समग्र स्थिति ६६.३७, प्रक्रियागत ६१.७६ र परिमाणात्मक ६४.७२ छ ।
देशभरका स्थानीय तहमा संस्थागत क्षमता स्वमूल्यांकन (एल आई एस ए–लिजा) कार्यान्वयनमा रहेको छ । गत वर्ष स्थानीय तह संस्थागत क्षमता स्वमूल्यांकन कार्यविधि, २०७७ जारी गरी संघीय मामिला तथा सामान्य प्रशासन मन्त्रालयले स्थानीय तहको स्वमूल्यांकन गर्ने कार्यक्रमलाई उच्च प्राथमिकताका साथ सञ्चालन गरिरहेको छ ।
यो प्रणालीमा स्थानीय तहले निश्चित सूचकका आधारमा आफ्नो मूल्यांकन आफैँ गरी आफैँबाट सुधारको मार्गप्रशस्त गर्नसक्ने व्यवस्था गरिएको छ । स्वमूल्यांकन प्रणालीको सही रूपमा कार्यान्वयन हुन सके स्थानीय तहमा देखिएका समस्याको समाधानका लागि मार्गप्रशस्त भई सेवाप्रवाह थप प्रभावकारी बन्नुका साथै जवाफदेहिता, पारदर्शिता र प्रतिस्पर्धात्मक सुधारमार्फत स्थानीय तहमा सुशासन कायम गर्न कोसेढुङ्गा सावित हुनसक्ने देखिएको छ ।
स्थानीय तहको संस्थागत क्षमता स्वमूल्यांकन कार्यविधिले लिजाको कार्यान्वयनमार्फत स्थानीय तहको कार्य प्रक्रिया र उपलब्धिका बारेमा लेखाजोखा गरी सबल र दुर्बल पक्षको पहिचान गर्न सघाउँछ । विकास तथा सुशासनका सन्दर्भमा रहेका कमीकमजोरी पहिल्याउन, आवधिक समीक्षाका लागि आधार प्राप्त गर्न र स्थानीय तहका बीचमा तुलनायोग्य सूचकहरू तर्जुमा गरी प्रतिस्पर्धात्मक सुधारमा अग्रसर गराई स्थानीय तहलाई सक्षम र प्रभावकारी बनाउने अभीष्ट राखेको छ ।
कार्यविधिमा स्थानीय तहमा स्वमूल्याङ्कनका लागि दसवटा विषय क्षेत्रमा विभिन्न सूचक निर्धारण गरिएका छन् । ती विषय क्षेत्रमा शासकीय प्रबन्ध, सङ्गठन र प्रशासन, वार्षिक बजेट तथा योजना व्यवस्थापन, सार्वजनिक सेवा प्रवाह र न्यायिक कार्यसम्पादन छन् । यसैगरी भौतिक पूर्वाधार, सामाजिक समावेशीकरण, वातावरण संरक्षण तथा विपत् व्यवस्थापन एवं सहकार्य र समन्वयजस्ता विषयलाई समेत स्वमूल्याङ्कनमा समावेश छ । यी दसवटा विषय क्षेत्रमा विभिन्न एक सयवटा सूचक निर्धारण गरी एक सय नै पूर्णाङ्क रहने गरी प्रत्येक सूचकको निश्चित अंकभार निर्धारण गरिएको छ ।
No comments:
Post a Comment