 |
| एमाले विदुरले शनिवार आयोजना गरेको सम्मान कार्यक्रममा विष्णु रिमाल लगायतका । |
विदुर । स्थानीय तहको निर्वाचनको मिति नजिकिन थालेपछि राजनीतिक दलहरूको पनि सक्रियता बढ्न थालेको छ ।
नुवाकोट जिल्लामा नेपाली कांग्रेस, नेकपा माओवादी केन्द्र, नेकपा एमाले, नेकपा एकिकृत समाजवादी, राप्रपा लगायत ठूला तथा साना राजनीतिक दलहरू मतदाताको घरदैलोमा पुग्न थालेका छन् । विशेष गरेर पार्टीहरूले टोल कमिटी बनाउने योजनालाई तिब्रता दिदैं मतदाताको टोलमा पुग्न थालेका हुन् । टोल कमिटि गठन र पार्टीको वडा कार्यालय उद्घाटनको नाममा पनि गाउँगाउँमा नेताहरूको ताँती लाग्न थालेको छ ।
गत फागुन २८ गते विदुर–५ पिपलटारस्थित पोष्टबहादुर बोगटीको सालिक अनावरणमा नेकपा माओवादी केन्द्रका अध्यक्ष पुष्पकमल दाहाल प्रचण्ड आएका थिए । जिल्लामा माओवादीले आफ्नो दलगत गतिविधिलाई तिब्रता दिनको लागि बोगटीको सालिकको अनावरणको योजनामा केन्द्रीय अध्यक्षलाई जिल्लामा ल्याउन सफल भएको हो । यसले सदरमुकाम रहेको विदुर नगरपालिकामा पार्टीको उपस्थितीलाई बलियो बनाउन थप सघाउने माओवादीका जिल्ला नेताहरूको विश्वास रहेको छ ।
फागुन ३० गते नुवाकोटमा प्रधानमन्त्री तथा नेपाली कांग्रेसका सभापति शेरबहादुर देउवा पनि नुवाकोट आएका थिए । किस्पाङ गाउँपालिका र तादी गाउँपालिकाका नवनिर्मित कार्यालय भवनको उद्घाटनको लागि जिल्लामा आएका सभापति देउवाको कारण कार्यकर्ताहरूमा उत्साह छाएको नेपाली कांग्रेस नुवाकोटका सचिव बैकुण्ठ मिश्रले बताए । नजिकिदो निर्वाचन, गठबन्धन सरकारको कारण व्यस्त रहेको प्रधानमन्त्री देउवाले नुवाकोटलाई प्राथमिकतामा राखेर आउनुले कार्यकर्ताहरूमा उत्साहित हुनु स्वभाविक रहेको मिश्रको भनाई छ ।
नेकपा एमालेबाट विभाजन भएर बनेको दल नेकपा (एकिकृत समाजवादी)का केन्द्रीय अध्यक्ष तथा पूर्वप्रधानमन्त्री माधवकुमार नेपाल पनि नुवाकोट आएका छन् । चैत ८ गते विदुरमा भएको अगुवा कार्यकर्ता भेलालाई सम्बोधन गर्न अध्यक्ष नेपाल नुवाकोट आएका हुन् । नेता नेपाल नुवाकोट आउनुलाई नेकपा एसका जिललाका नेता तथा कार्यकर्ताहरूले आफ्नो पार्टीको प्रभावमा थप विस्तार हुने अपेक्षा गरिएको जिल्ला कमिटि सदस्य तथा आर्थिक विभाग प्रमुख रामकृष्ण राजभण्डारी बताउँछन् ।
विभिन्न पार्टीबाट समाजवादीमा प्रवेश गर्ने तीन सय जनाभन्दा बढीलाई अध्यक्षको हातबाट टीका लगाएर स्वागत समेत गराए । नेकपा एमालेबाट निर्वाचित विदुर नगरपालिका वडा नं. ६ का वडाअध्यक्ष राजु सडौला पनि अध्यक्ष नेपालको हातबाट टीका लगाएर प्रवेश गरेका थिए । सडौलाले तीन महिनाअघि नै एमाले छाडेर बसेका थिए ।
ठूला र सत्तासिन दलका केन्द्रीय अध्यक्षहरूको लर्को नुवाकोटमा आइरहेको बेलामा प्रमुख प्रतिपक्ष दल नेकपा एमाले पनि चुनाब केन्द्रित कार्यलाई तिब्र बनाएको छ । तर, यो पटक नेकपा एमालेका अध्यक्ष केपी ओलीलाई नुवाकोट ल्याउने योजना भने पुरा नहुने भएको छ । नेपाल बुद्धीजिवी परिषदको केन्द्रीय महाधिवेशन नुवाकोटमा गर्ने र कार्यक्रमलाई सम्वोधन गर्न अध्यक्ष ओली आउने कार्यक्रम रोकिएको एमाले केन्द्रीय सदस्य तथा जिल्ला इन्चार्ज विन्दा ढुङ्गानाले जानकारी दिए ।
बिहीवार नेकपा एमालेका उपमहासचिव बिष्णु रिमाल सम्मान ग्रहण गर्न नुवाकोट आएका थिए । समग्र नुवाकोटको भूगोलबाट नेकपा एमाले पार्टीको केन्द्रीय समिति, प्रदेश र जिल्लागत पदीय भूमिकामा पदमा सर्वसम्मत चयन भएकाहरूको सम्मानमा आयोजित कार्यक्रममा सहभागि हुन उनी नुवाकोट आएका हुन् । रिमालसहित ४५ जना एमालेका नेताको विदुर नगरकमिटिले सम्मान गरेको थियो । पार्टीको केन्द्रीयस्तरसम्म जिम्मेवारी सम्हालेका नेताहरूको सम्मान गरिएको हो । सम्मानित हुनेमा केन्द्रीय उपमहासचिव रिमाल, स्थायी कमिटी सदस्य विन्दा पाण्डे, केन्द्रीय कमिटी सदस्य विन्दा ढुंगाना, उषाकिरण तिमिल्सिना, बागमती प्रदेश कमिटी अध्यक्ष केशवराज पाण्डे, प्रदेश सदस्यहरू तथा विदुर नगरपालिकाबाट विभिन्न कमिटिमा प्रतिनिधित्व गर्नेहरूको सम्मान भएको हो ।
स्थानीय तह निर्वाचनको मुखमा विदुर नगरमा केन्द्रीय अध्यक्ष उतार्न पाए मतदाताको विस्वास थप जित्न सक्ने एमालेको आंकलन छ ।
यस्तै, कांग्रेसका प्रवक्ता डा. प्रकाशशरण महत, केन्द्रीय नेताहरू अर्जुननरसिंह केसी, डा. रामशरण महतको पनि नुवाकोटमा पछिल्लो समय बाक्लै उपस्थिति देखिन थालेको छ । केन्द्रीय सदस्य तथा सांसद बहादुरसिंह लामा तामाङले जाडो महिना सुरु भएदेखि विद्यालयका छात्राछात्रलाई पोशाक वितरण गर्न गाउँगाउँ पुग्दै आएका छन् । अर्जुननरसिंह केसी योशोदादेवी भगवानसिंह मेरोरियल ट्रष्टबाट स्वास्थ्य सामग्री बोकेर गाउँगाउँमा पुगेका छन् ।
राप्रपाले पनि गतिविधिलाई तिब्रता दिएको छ । कमल थापाले राप्रपा टुक्राएर राप्रपा नेपाललाई सक्रिय बनाए पनि नुवाकोटमा भने फुटको प्रभाव परेको छैन । राप्रपाले कार्यकर्ता प्रशिक्षण सञ्चालन गरेको छ । भने गएको विहीबार विदुरमा पत्रकार सम्मेलन गरी आगामी स्थानीय तहको निर्वाचनको लागि उम्मेदवार बन्नेहरूलाई उम्मेदवारको धार्मिक संस्कार अनुसार कसम खुवाएर उम्मेदवार बनाउने रणनीति छ ।
No comments:
Post a Comment