धुञ्चे । चालू आर्थिक वर्षमा रसुवा प्रहरीले गरेका कामबाट ३० प्रतिशतले आपराधिक घटना न्यूनीकरण भएको छ ।
रसुवाको सुरक्षा अवस्था सुदृढ भएका कारण भवितव्य बाहेक अन्य घटना न्यूनीकरण हुँदै गएको प्रहरी तथ्याङ्कले देखाएको हो । जिल्ला प्रहरी प्रवक्ता विष्णु प्रदीप बत्स्यालका अनुसार नेपाल प्रहरीले सुरक्षा गस्तीलाई तीव्रता दिएको, सुरक्षाका सवालमा समुदाय माझ थप जनचेतना, शङ्कास्पद व्यक्तिको समयमै पहिचान र अवैध गतिविधिको निगरानीमा तीव्रता दिइरहेका कारण गत विगतको तुलनामा यो वर्ष आपराधिक क्रियाकलाप ३० प्रतिशतले कमी आएको तथ्याङ्कले देखाएको हो ।
चालू वर्षमा कर्तव्य ज्यान अन्तरगत एक वटा मात्र मुद्दा दायर भएको छ । १६ जना भवितव्य एवं चार जना सवारी दुर्घटनाबाट निधन भएको प्रहरी तथ्याङ्कले देखाएको छ । गत वर्ष सवारी दुर्घटनाका कारण ७१ जनाको ज्यान गएको बताइएको छ ।
बहुविवाह गर्ने गत वर्ष पाँच जना थिए भने यो वर्ष शून्य रहेको छ । जबरजस्ती करणी मुद्दामा दुई, ठगी अभियोगका चार जनालाई मुद्दा दायर गरेको जिल्ला प्रहरी कार्यालय रसुवाले जनाएको छ । गत आर्थिक वर्ष ०७७/७८ मा विविध प्रकारका ५९ वटा मुद्दा दायर भएकोमा चालू आवमा भने ४१ मात्र मुद्दा जिल्ला सरकारी वकिल मार्फत अदालत समक्ष दायर भएको प्रहरीले स्पष्ट पारेको छ ।
फैसला कार्यान्वयन अन्तरगत अदालतले तोकेको ७३ हजार जरिवाना असुली कार्यमा सहयोग पु¥याउनुको साथै अदालतले दुई वर्ष सम्म कैदको फैसला सुनाई फरार अभियुक्तलाई नियन्त्रणमा लिई प्रहरीले अदालत मार्फत कारागार बुझाएको छ । गत विगतको भन्दा नेपाल प्रहरीको जनशक्ति थप हुँदै गएको, कुनै पनि घटना घट्दा साथ घटना स्थलमा प्रहरी छिटो परिचालित हुने गरेको छ ।
No comments:
Post a Comment