विदुर । नेपाल र चीन रसुवागढी–केरुङ नाकामा दुईतर्फी ब्यापार सञ्चालन गर्न सहमत भएका छन् ।
नेपाल–चीनबीच बिहिबार भएको सीमा परामर्श बैठकमा उक्त सहमति भएको हो । भर्च‘अल रुपमा बैठकमा चीनले स्वास्थ्य मापदण्ड पालना गर्दै रसुवागढी नाकाबाट दुवै मुलुकमा सामान आयात निर्यात सुचारु गर्न सहमति जनाएको हो । रसुवागढी नाका कोभिड–१९ महामारी सुरु भएदेखि आंशिक मात्रै सञ्चालनमा छ ।
परामर्श बैठकमा नेपाली टोलीको नेतृत्व परराष्ट्र मन्त्रालयका उत्तर पूर्वी एसिया महाशाखा प्रमुख लोकबहादुर थापा र चिनियाँ टोलीको नेतृत्व विदेश मन्त्रालयको सीमा तथा समुन्द्री मामिला विभागका महानिर्देशक होङ लियाङले गरेका थिए ।
यसै बीच, रसुवाका प्रमुख जिल्ला अधिकारी नवराज जैसीले रसुवागढी केरुङ नाका दोहोरो सञ्चालन हुने सहमतिबारे केहीदिन अघि सामाजिक सञ्जालबाट जानकारी पाएको बताए ।
परराष्ट्र मन्त्रालय र चिनियाँ केन्द्रीय प्रतिनिधिहरूबीच असार ३० गते भएको सीमा समन्वय बैठकमा कोभिड प्रोटोकल पालना गर्दै नाका दोहोरो सञ्चालन गर्ने सहमति गरेको थियो । रसुवाका प्रमुख जिल्ला अधिकारी जैसीका अनुसार नेपाल चीन बैठकलाई नेतृत्व गरेका परराष्ट्र मन्त्रालयका सहसचिव लोकबहादुर थापाले फेसबुकमा पोष्ट गरेको विज्ञप्तिमार्फत उनले नाका सञ्चालनको निर्णयबारे जानकारी पाएका हुन् ।
अहिले सम्म रसुवागढी नाका एकतर्फी मात्रै सञ्चालन भैरहेको छ । चिनबाट नेपाल तर्फ सिमित कोटामा तोकिएको कन्टेनर मार्फत सामाग्री आयात मात्रै भैरहेको छ । केन्द्रमा सहमति भएको ४ दिन बितिसक्दा पनी रसुवागढी भन्सार कार्यालय र जिल्ला प्रशासन कार्यालय रसुवामा औपचारिक जानकारी छैन ।
रसुवाका प्रमुख जिल्ला अधिकारी नबराज जैसीका अनुसार चीन र नेपाली अधिकारीबीच भएको विगतको सम्झौता अनुसार अहिले नाकाबाट कोभिड मापदण्ड पालना गरेर दैनिक १४ कन्टेनर मालवस्तु ढुवानी भैरहेको छ । यो पनि एकतर्फि रुपमा चिनको कन्टेनरले नेपाली सिमा सम्म ल्याउने गरेको छ । नेपाली वस्तु चीनमा निर्यात गर्न बन्देज भएको दुई वर्ष नाघिसकेको छ ।
नेपालले वस्तु आयात मात्रै गर्न पाउने नाकाबाट अहिले सुविधा पाए अनुसारको दैनिक कोटामा मालवस्तु समेत आउन सकेको छैन । चिनियाँ प्रशासनले रसुवागढी केरुङ नाकाबाट अहिले दैनिक १४ कन्टेनर सामाग्री निर्यात गर्ने जनाए पनि सिजन नभएका कारण अहिले दैनिक ६/७ वटा मात्रै कन्टेनरमा सामाग्री आयात भइरहेको भन्सार कार्यालयले जनाएको छ ।
रसुवा भन्सारका प्रमुख भन्सार अधिकृत रामप्रसाद मैनालीले पनि नाका दोहोरो सञ्चालनबारे थप प्रगति नभएको बताए । नेपाल–चीनको तिब्वतबीच द्विपक्षीय व्यापार सहजीकरण गर्ने उद्देश्यले बनेको नेपाल–तिब्वत व्यापार सहजीकरण समितिको बैठक आइतबार बसेको थियो । छलफलमा दुई पक्षीय व्यापारमा सहजीकरण, वैदेशिक लगानी, व्यापार पूर्वाधारको विकास, पारवहन सुविधाका साथै भन्सार प्रकृयामा सरलीकरण लगायतका विषयमा छलफल भएको उद्योग वाणिज्य तथा आपूर्ति मन्त्रालयले जनाएको छ ।
छलफलमा स्थलगत मार्गबाट नेपालबाट निकासी हुने मालवस्तुको ढुवानी प्रकृयालाई छिटो सहज गर्ने विषयका साथै नेपाली वस्तुहरूको चिनियाँ बजारमा सहज प्रवेशकाबारेमा छलफल भएको मन्त्रालयल जानकारी दिएको छ । ‘निर्बाध रूपमा दुईतर्फी व्यापार गर्न उपयुक्त विधि अवलम्वन गर्ने विषयमा समेत छलफल भएको थियो ।
२०७७ भदौ १६ मा नेपाली श्रमिकमा कोरोना देखिएपछि रसुवागढी नाका चिनियाँ पक्षले बन्द गराएको थियो । तर, नेपालको ताकेतापछि कडा कोभिड शर्तका साथ २०७७ माघ २९ गते बाट चीनले एकतर्फी रुपमा नाका खुला गरेको थियो ।
No comments:
Post a Comment