बेलकोटगढीको सय दिन सय काम

बेलकोटगढी नगरपालिकाका मेयर जगतबहादुर गुरुङ कार्यावधिको समीक्षा गर्दै (बीचमा) । 

बेलकोगढी । स्थानीय तहमा नयाँ सरकार गठन भएको एक सय दिन पुरा भएको छ । एक सय दिनमै अनियमितताको दलदलमा परेको स्थानीय सरकरपनि नुवाकोटमा देखिन थालेका छन् । 

कुनै स्थानीय सरकारले सिन्को समेत भाच्न नसक्दा नागरिकसंग ‘फेस’ गर्न समेत सकेका छैनन् । तर नुवाकोटको बेलकोटगढी नगरपालिकाका आफ्नो एक सय दिनको कामको समीक्षा गरेको छ । 

गत सोमवार नगरपालिकाद्धारा आयोजित समीक्षा कार्यक्रममा निर्वाचित जनप्रतिनिधिले एक सय दिनमा ‘एक सय एक’ नयाँ काम गरेको दाबी गरिएको छ । मेयर जगतबहादुर गुरुङले नियमित सेवा प्रवाह र विकास निर्माणमा जनपक्षीय सुधारको सुरुवात भएको बताएका छन् । उनका अनुसार जनप्रतिनिधिसहित कर्मचारीमार्फत दैनिक कार्य सञ्चालन बाहेक नगरवासीको हितमा नयाँ कामको थालनी भएको छ ।

जनताको घरदैलोमा पुगेर गुनासो तथा पीरमर्का सुन्नेदेखि मन्त्रालयसम्म पुगेर थप बजेट ल्याउनको लागी गरिएको पहललाई नयाँ कामको रुपमा उनले उल्लेख गरेका छन् । 

बेलकोटगढीले सामाजिक सुरक्षा तथा पञ्जीकरण सेवा एकाइ, शिक्षा, स्वास्थ्य, रोजगार सेवा केन्द्र, प्रशासन–अनुगमन तथा योजना, पूर्वाधार विकास, न्यायिक समिति, आर्थिक विकास शाखाको कृषि र पशुलगायत विषयगत शाखामार्फत गरिएका कार्य सम्पादन लगायत एक सय वटा काम नयाँ गरेको उत्तः कार्यक्रममा जानकारी दिइयो । 

अहिलेको नेतृत्वले गरेका सुधारका कार्यमा सहरी विकास मन्त्रालयमार्फत थप बजेट स्वरुप पूर्वाधार विकासका लागी एक करोड प्राप्त, निर्माण व्यवसायीमार्फत ठेक्का रद्द भएर अलपत्र बनेको पासाङल्हामु सडकको पहिरो पन्छाउने तथा खाल्डाखुल्डी पुरेर यातायात सञ्चालनमा ल्याएको, पालिकाको केन्द्रसहित मोबाइल नेटवर्कको पहुँच नपुगेको स्थानमा नयाँ बिटिएस टावर निर्माणको लागी सर्वेक्षण जस्ता नयाँ काम भएको मेयर गुरुङले बताए । 

यस्तै, बेलकोटगढी नगरपालिकाका उपमेयर शिब दाहालका अनुसार पहिरो पीडितलाई ५० हजार र अग्नी पीडितलाई एक लाख राहत उपलब्ध, वडा नं. २ को कुमरी खोला र ११ को अमारे खोलामा आपत्कालीन पुल निर्माण, कृषिमा आधुनिकीकरण र यान्त्रिकरणको लागी कोरियन कम्पनी ‘ग्रीन ल्याब’सँग भगिनी सम्बन्धसहित सहकार्य सम्झौता नयाँ काममा रुपमा नगरपालिकासंग रहेको छ । त्यसै गरी, मिलेनियम च्यालेञ्ज अकाउन्ट (एमसिए–नेपाल) मार्फत वडा नं. ७ रातमाटेमा सवस्टेशन निर्माणले प्रभावित हुने स्थानीयवासीलाई राहतसहित पालिकाको लागी पूर्वाधार विकासमा सहकार्य प्रस्ताव, वडा नं. ५, ६ र ७ को सबै घरमा केन्द्रीय विद्युतीय प्रशारण विस्तार लगायतको कार्यलाई एकसय दिनको अवधिमा गरिएको उपलब्धिको रुपमा लिएको उपमेयर दाहालले बताएका छन् । 

प्रमुख प्रशासकीय अधिकृत सूर्यदर्शन पण्डितले १३ वडा रहेको बेलकोटगढीमा अहिलेको नेतृत्वले गत जेठ ९ गते सपथ लिएर जिम्मेवारी सुरु गरेदेखि हालसम्मलाई ‘कामको लागी कमजोर’ भए पनि सेवा सुधारको लागि ‘अब्बल’ बनाउन सकिएको दाबी गरेका छन् । सुशासन, नीति निर्माण, समन्वय तथा सहजीकरणमार्फत जनताको सुधारका काममा समेत उपलब्धि हासिल भएको पण्डितले बताए ।