नुवाकोटमा धेरै मत बदर

विदुर । नुवाकोटमा मतदाता शिक्षा प्रभावकारी नहुँदा बदर मतको संख्या बढेको छ । मंसीर ४ गतेको चुनावमा नुवाकोट जिल्लामा ६ हजार ६८० मत बदर भएको छ । यहाँ एक लाख २९ हजार ७०५ मत खसेको थियो । जिल्ला निर्वाचन कार्यालय नुवाकोटका अनुसार ५.१५ प्रतिशत मत बदर भएको हो ।

समानुपातिकमा अझ धेरै मत बदर भएको छ । समानुपातिमा प्रतिनिधि सभाका लागि गरेको नागरिकहरूको मत ६ हजार १४३ मत वदर भएको छ । १ लाख २२ हजार ८४२ मत सदर भएको थियो । एक लाख २८ हजार ९८५ मत खसेको थियो । नुवाकोटमा समानुपातिमा भोट हाल्नुपर्ने मतदाता  दुई लाख ३९ हजा ७२६ थिए ।

समानुपातिकमा प्रतिनिधि सभामा भन्दा प्रदेश सभामा एक हजार एक सय भन्दा बढी मत खसेको छ । प्रदेश सभामा एक लाख ३० हजार १०१ मत खसेको छ । जसमा एक लाख २१ हजार १८२ मत सदर भएको छ । अर्थात् प्रदेश सभामा आठ हजार ९१९ मत वदर भएको छ । 

बदर मत घटाउनका लागि मतदाता शिक्षा स्वंयम्सेवक, महिला स्वास्थ्य स्वंयम्सेविका तथा सम्बन्धित निकायले मतदाता शिक्षा दिएका थिए । मतदाताहरू प्रत्यक्ष र समानुपातिकतर्फको मतपत्रमा अलमलिएका कारण मत बदर हुन पुगेको जिल्ला निर्वाचन अधिकारी जयप्रसाद गौतमले जानकारी दिए । 

प्रदेश सभाको प्रत्यक्षतर्फ एक लाख ३० हजार १०१ मत खसेकोमा आठ हजार ९२१ मत अर्थात् ६.८५ प्रतिशत मत बदर भएको छ । प्रदेशसभाको समानुपातिकतर्फ एक लाख ३० हजार १०१ मतमध्ये ८ हजार ९१९ अर्थात् ६.८५ प्रतिशत मत बदर 

भएको जिल्ला निर्वाचन अधिकारी गौतमले जानकारी दिए । उनका अनुसार गत २०७४ को निर्वाचनमा प्रतिनिधिसभाको प्रत्यक्षतर्फ ६.४ र समानुपातिकतर्फ ४.७ प्रतिशत मत बदर भएको थियो ।