विदुर । जिल्ला न्यायाधीश उमेशप्रसाद लुइँटेलले शुक्रवार आयोजित एक कार्यक्रममा प्रश्न गरे– ‘न्याय महंगो कहाँबाट हुन गयो ? कसरी हुन गयो ?’
नेपाल वार एशोसिएशन नुवाकोट जिल्ला अदालत वार एकाईको १५ औं वार्षिक साधारण सभामा बोल्दै जिल्ला न्यायाधीश लुइँटेलले अदालति प्रक्रियामा हुने खर्च ५/१० रुपैयाँको भएपनि नागरिकहरूले न्याय महंगो हुने गरेको बताउने गरेको उल्लेख गरे । ‘अदालतमा लिने सेवाको दस्तुर ५/१० रुपैयाँको हुन्छ, तर पनि नागरिकहरू न्याय महंगो भयो भन्छन्, यही कार्यक्रमका पुर्ववक्ताहरूले पनि यो कुरा उठाउनुभयो, कसरी भयो र कहाँबाट भयो ?’ न्यायाधीश लुइँटेलले भने ।
यो संवेदनशिल पाटोमा कानुन व्यवसायीहरू समेत गम्भिर हुनुपर्ने उनको भनाई रहेको छ । कानुन व्यवसायी र वारको सहकार्यमा आफुले अदातलको न्याय सम्पादनमा हुँदै आएको बिचौलिया हटाएको बताउँदै लुइँटेलले अझै पनि त्यस्ता क्रियाकलाप भएगरेको भए ख्याल गर्न कानुन व्यवसायीहरूलाई आग्रह गरेका छन् । ‘३३ महिनादेखि यहाँ कार्यरत छु, थुप्रै समस्याहरूलाई समाधान गरेको छु, जनआस्था कायम गर्ने र सिघ्र न्यायका लागि मेरो अनवरत प्रयास रहिरहेको छ’ न्यायधीश लुइँटेलले भने । अदालतप्रतिको स्वतन्त्रता र विश्वास कायम राख्नका लागि कानुन व्यवसायी र वारको भुमिका महत्वपूर्ण रहेको पनि उनले बताएका छन् ।
कार्यक्रममा नुवाकोटका प्रमुख जिल्ला अधिकारी नारायणप्रसाद रिसाल, जिल्ला न्यायाधिवक्ता टेकराज भुषाल, वारका निर्वतनमा अध्यक्ष देवराज कँडेल, पुर्व अध्यक्षहरू रामेश्वर उपाध्याय, सुरेन्द्रराज अधिकारी, श्रीराम पाण्डे, शम्भु नेपाल, नेपाल पत्रकार महासंघका नुवाकोटका अध्यक्ष कपिलदेव खनाल लगायतले मानव अधिकार र न्याय पाउने नागरिकको हक संरक्षणका लागि नुवाकोट वारको योगदान र भूमिकाको बारेमा चर्चा गरेका थिए ।
यसै बीच, नेपाल वार एशोसिएशन नुवाकोट जिल्ला अदालत वार एकाईको १५ औं वार्षिक साधारण सभाको बन्दसत्रमा वारका अध्यक्ष राजाराम थपलिया, सचिव कुमार अधिकारी र कोषाध्यक्ष कृष्णलाल श्रेष्ठले पेश परेको प्रतिवेदनहरू पारित भएका छन् । साथै साधारण सभाले अदालतको काम कारबाहीलाई सघाउन पु¥याउन र सहज न्याय प्राप्तीका लागि समिति गठन गर्ने निर्णय गरेको छ । अब बस्ने वारको समिति कार्य समितिको बैठकले समिति गठन गर्ने अध्यक्ष थपलियाले जानकारी दिएका छन् ।
