Monday, August 29, 2022

बेलकोटगढी नगरपालिकाको अभियान कृषि र विद्युतिकरणमा केन्द्रीत

बेलकोटगढी नगरपालिकाका मेयर जगतबहादुर गुरुङ (दाँयाँबाट दोश्रो) कृषकसंग । 

बेलकोटगढी । बेलकोटगढी नगरपालिकाका मेयर जगतबहादुर गुरुङ नगरपालिकाका  सम्भावना र तत्काल हटाउनुपर्ने समस्याको खोजीमा केन्द्रीत देखिएका छन् । उनी नगरपालिका भित्र पछिल्लो समय कृषिमा सम्भावनाको खोजी गरिरहेका छन् । साथै नगरपालिकाका ग्रामिण भेगमा विद्युत लैजाने  अभियानमा आफै विजुलीका तार बोकेर कुद्न थालेका छन् । 

मेयर गुरुङ नगरपालिकाको कृषहरूको सम्भावना र उब्जिएको समस्याको समाधानका लागी खेतवारी, कृषिफर्म र विभिन्न कृषि बिज्ञहरूसंग नियमित भेटघाट छलफल र अन्तरक्रियामा बोक्लै भेटिन थालेका छन् । घरीको कृषक समसहुसंगको छलफल त घरीको कृषकको खेतबारीमा पुग्थ्न थालेका मेयर गुरुङ कृषिमा आधुनिकिरणका लागि सम्भावना देखिएरहेका छन् । ‘हामीसंग कृषिबाटै नागरिकहरूको आर्थिक उत्थान गर्नेको विकल्प छैन’, उनले भने– ‘परम्परागत खेती प्रणालीले बिहान बेलुकाको गाँस समेत धान्न नसक्ने आवस्था सृजना भइरहेको छ, त्यसबाट आर्थिक आर्जन गर्ने त परको कुरा । त्यसैले पनि हामी नागरिहरूलाई सघाउने योजना बनाउने धुनमा छौं ।’

गएको शनिबार मेयर गुरुङ ललितपुरको गोदावरी स्थित सर्बश्रेष्ठ बिउ उत्पादन केन्द्रको अध्ययनका साथै बिउविजन बिशेषज्ञ प्रबेश श्रेष्ठसंगको भेटमा व्यस्त देखिए । आफ्नो नगरपालिका ग्रामीण नगरपालिका, भुगोल र मौसमको हिसाबले धेरै प्रकारका खाद्य बस्तुहरूको बिउ उत्पादन गर्न सकिने भएकोले त्यसको सम्भावनाका लागी अध्ययन गर्न नगरप्रमुख कृिष बिशेषज्ञहसंग प्राय छलफलमै थिए । नगरपालिका भित्र रहेका कृषक, कृषिफर्म, कृषका समुह र सहकारी सस्थाहरूसंग मिलेर पालिकाभित्रनै आवश्यक बिउ–बिजन उत्पादनमा लाग्ने योजनामा रहेकोले उनले तरकारीजन्य बस्तुको बीउ उत्पादनको निमित्त ललितपुरको सर्बश्रेष्ठ सिडससंग प्राबिधिक सहयोगको लागि आग्रह समेत गरेका छन् । 

सम्भावना बोकेको बेलकोटगढीका बेरोजगार युवाहरूलाई समेटेर बैदेशिक रोजगारमा जाने क्रममा रहेका  युवालाई स्वदेशमै  काम गर्ने बाताबरण बनाउनको लागि प्राबिधिक सहयोग मात्रै चाहेकोले सहयोग गर्न र यहाँ उत्पादन हुन सक्ने बिउ–बिजनको बारेमा अध्ययन र अनुसन्धान गरी कृषकहरूलाई आवश्यक परामर्श गरिदिन उनले आग्रह गरे । 

यसको लागि नगरपालिकाको तर्फबाट गर्नुपर्ने सबै कार्यहरूको लागि नगरपालिका तयार रहेको बताउँदै मेयर गुरुङले किसानले गुणस्तरीय बिउ प्रयोगगरी र उत्पादन बढाई किसानको मुनाफाको सुनिश्चितताको लागी खास काम गर्ने जनाएका छन् । ‘आउँदो बर्षहरूमा बिउ–बिजनहरू अन्यत्रबाट किन्नुपर्ने बाताबरण अन्त्य गर्ने र धान, गहुँ, मकै, कोदो र आवश्यक अन्य खाद्यान्नबालीको बिउविजन उत्पादनमा लाग्नुपर्ने देखिएको छ र म यसमा काम गर्न थालिसकेको छु’ गुरुङले भने । 

कृषिमा क्रान्ति बोलेर मात्रै नआउने र यसको लागि आधुनिकिकरण र यान्त्रिकरणमा लागेर गुणस्तरीय बिउ–बिजन र समयमानै मलको व्यवस्थापन गरेमात्रै कृषिमा क्रान्ति गर्न सकिने भएकाले उक्त लक्ष्यका साथ बेलकोटगढी नगरलाई कृषिमा आत्मनिर्भर बनाउने आफ्नो उद्देश्य रहेको उनले बताएका छन् । 

पोलपोलमै पुग्न थाले मेयर गुरुङ


बेलकोटगढी । कृषिको सम्भावनाका साथमा नागरिकहरूलाई त्तकालदै पर्ने समस्या समामाधानका लागि भिडिरहेको उनी हिजोआज बिजुलीबत्तीका तार आफ्नै बोकेर समस्या भएको पोल पोल र टोलटोलमा पुग्न थालेका छन् । 

आफ्नो कार्यकालय सुरु भएको छोटो समयमा नै बेलकोटगढी नगरपालिकाले बिद्युतीकरणमा फड्को मारेको उनको भनाई रहेको छ । उनका अनुसार नगरपालिकाको वडा नम्बर ५, ६ र ७ हुँदै पालिकाको केन्द्र बाघखोरसम्म विद्युतीकरणको लाईन धमाधम विस्तार हुँदैछ । नगरप्रमुखमा निर्बाचित भएर आएसँगै मेयर जगतबहादुर गुरुङले सबै वडामा नियमित र व्यवस्थित तरिकाले बिद्युत पु¥याउने उद्घोष गरे अनुसारको काम आरम्भ भएको उनले बताएका छन् । 

‘सबै वडामा यसअघि नै बिद्युतको लाईन पुगेपनि व्यवस्थित थिएन । कतै बाँसको लौरो गाडेर, कतै काठको खम्बा गाडेर बिद्युतीकरण गरिएको नगरपालिकामा अब भने पक्की फलामे पोल र नयाँ ट्रान्समिटर सहितको व्यबस्थित बिद्युतीकरणको कार्य भैरहेको छ’ मेयर गुरुङले भने । 

बेलकोटगढी नगरको वडा नम्बर ७ को थालडाँडामा हालसम्म बिजुलीको लाईन नपुगेको केही दिनमै त्यहाँका नागरिकहरूको घरमा बिजुली बाल्न सकिने प्रमुख गुरुङले जानकारी दिएका छन् । बिद्युत प्राधिकरण बितरण केन्द्रको सहकार्यमा व्यवस्थित बिद्युतिकरणको काम भइरहेको छ ।

बेलकोटगढी नगरपालिकामा अव्यवस्थित विद्युतिकरणका कारण  नागरिकहरूको ज्यान समेत गइसकेको छ । 

डिपिआर बोकेर मन्त्रालय

काठमाडौं । बेलकोटगढी नगरपालिकाका मेयर जगतबहादुर गुरुङ गत हप्ता ३७ किलोमिटर सडकको डिपिआर बोकेर शहरी विकास मन्त्रालय पुगेका छन् । 

बाघखोरबाट गल्छी–त्रिशुली–केरुङ मार्ग जोड्ने ३७ किलोमिटर कोल्पुटार–डबली–दियाले–बाघखोर सडक रकम अभावले निर्माण सुरु हुन नसकेको भन्दै मेयर गुरुङ डिपिआर बोकेर उनी मन्त्रालय पुगेका हुन् । 

मन्त्री मेटमणी चौधरीसँग भेटेर मेयर गुरुङले सो सडक योजनामा समावेश गरी नगरपालिकाको केन्द्रलाई मुल सडकसम्म जोड्ने मार्ग निर्माणमा सहयोग गर्न माग गरेका छन् । मन्त्री चौधरीले डिपिआरअनुसारको सडक निर्माणको सो योजना कार्यान्वयन गर्नका बजेट व्यवस्थापन गर्ने प्रतिबद्धता व्यक्त गरेको गुरुङले बताए । 

बेलकोटगढी र कोरियनबीच सम्झौता पत्रमा हस्ताक्षर


बाघखोर । बेलकोटगढी नगरपालिकाले कृषिमा आधुनिकीकरण, यान्त्रिकरणलगायत विषयमा कोरियन कम्पनी ग्रिनल्याब्ससँग समझदारीपत्रमा हस्ताक्षर गरेको छ ।

मेयर जगतबहादुर गुरुङ र कोरियन कम्पनीका प्रतिनिधिले एक कार्यक्रमबीच गएको शुक्रबार हस्ताक्षर गरी समझदारी पत्र (एमओयू) आदानप्रदान गरेका छन् । सम्झौतापत्र अनुसार बेलकोटगढी नगरको कृषिमा आधुनिकीकरण, यान्त्रिकरण, आलुको बीउ उत्पादन गरी उत्पादन उपभोग, प्रशोधनसहित बजारीकरणको ग्यारेन्टी ग्रिनल्याब्स कम्पनीले गर्नेछ ।

साथै कृषकलाई आत्मनिर्भर बनाउनुका साथै कृषकहरूको सामाजिक सुरक्षा, युवाहरूलाई रोजगारीसँग जोड्ने उद्देश्यले पनि समझदारी पत्रमा हस्ताक्षर गरिएको मेयर गुरुङले बताएका छन् । नगर र कोरियाका कृषकहरूबीच कृषि क्षेत्रका अनुभव साटासाट गरेर काम गरिने छ । 


बन्दुकसहित एक जना पक्राउ

विदुर । बेलकोटगढी नगरपालिकाका एक युवक भरुवा बन्दुकसहित पक्राउ परेका छन् । वडा नम्बर ४ बानियाँगथाउँ आँपबोटेका ४० वर्षिय सन्तवहादुर गुरुङ समातिएको जिल्ला प्रहरी कार्यालय नुवाकोटले जनायो ।

उनलाई गत सोमवार भरुवा बन्दुकसहित झिल्टुङबाट प्रहरीले पक्राउ गरेको हो । प्रहरी चौकी झिल्टुङबाट गस्तीमा जाने क्रममा प्रहरीले उनलाई भरुवा बन्दुकसहित पक्राउ गरेको प्रहरीले जनायो । 

विद्याश्रमलाई अमेरिकी सहयोग

बाहुनवेंशी । नुवाकोटबाट अमेरिका गई बसोबास गर्ने नेपालीहरूको संगठित संस्था नुवाकोट अमेरिका सम्पर्क समितिले हेमन्तेश्वर बेदविद्याश्रम (गुरुकुल) लाई आर्थिक सहयोग पठाएको छ । 

समितिले तादी गाउँपालिकाको वडा नम्बर ५ बाहुनबेंशीमा रहेको उक्त गुरुकुललाई एकलाख २६ हजार ४१९ रुपैयाँ सहयोग गरेको हो । संस्कृती जगेर्नार्थ र संरक्षणार्थको साथै विद्यार्थीको खानपान र आवासका लागि उक्त सहयोग प्रदान गरिएको समितिका अध्यक्ष विज्ञान खनालले जानकारी दिए । 

समितिका सदस्य सुरेश भण्डारीको परिवारको तर्फबाट बुधबारनै लक्ष्मी भण्डारीले गुरुकुलका अध्यक्ष भृगुऋषि मिश्रलाई २४ हजारको चेक हस्तान्तरण गरेका छन् । गुरुकुल वैदिक सनातन धर्मको संरक्षण, सम्बद्र्धन र आधुनिक गुरुकुलको परिकल्पनालाई साकार पार्नको लागि स्थापित भएको हो ।

समितिले नुवाकोटका शैक्षिक तथा स्वास्थ्य क्षेत्रमा सहयोग परियोजना शीर्षक राखी सहयोग हस्तान्तरण कार्यक्रम सञ्चालन गरिरहेको छ ।

तीन हजार तिरेर सपथ खाएका एमाले नेताहरू आफ्नो नाम खोजी गर्दै

 २०७८ पुस २५ गते सम्पन्न एमाले नुवाकोटको सातौं जिल्ला अधिवेशन । फाइल तस्बिर 

विदुर । गत हप्ता नेकपा एमाले नुवाकोटका पूर्व जिल्ला कमिटी सदस्य एवं विदुर नगरपालिका वडा नम्बर ४ का दुई पटकका निर्वाचित अध्यक्ष गोपालमान श्रेष्ठले सामाजिक सञ्जाल फेसबुकमा जिल्ला कमिटीको सूची मागेको निवेदनात्मक अनुरोध सार्वजनिक गरे । जिल्ला अधिवेशन सम्पन्न भएको सात महिनासम्म नेता र कार्यकर्ताले जिल्ला कमिटीको सूची खोजी गरिरहेका छन् । तर अहिलेसम्म पाउन नसकेको श्रेष्ठको ‘फेसबुक स्टाटस’ले खुलासा गरेको छ । 

नेकपा एमाले नुवाकोटको जिल्ला अधिवेशन २०७८ पुस २५ गते सम्पन्न भएको थियो । तर पदाधिकारी बाहेक जिल्ला कमिटीमा को को हुन भन्ने कुरा नेता कार्यकर्ताले अहिलेसम्म जान्न पाएका छैनन् । गोपालमानको जिल्ला कमिटीको सूची मागेको स्टाटसमा कमेन्ट गर्दै नेकपा एमाले बागमती प्रदेश कमिटीका सदस्य नारायण घिमिरेले एमाले नुवाकोट जिल्ला कमिटी भन्दा प्रालि भैरहेको उल्लेख गरे । उनले विधान अनुसारको संख्या कति हुनुपर्ने हो त्यो सार्वजनिक गर्नुपर्ने भन्ने प्रश्न गर्दै जिल्ला कमिटी नभई मैनाली प्रालीको रुपमा जिल्ला पार्टी गइरहेको ठोकुवा गरेका छन् । 

नेकपा एमालेको विधान अनुसार नुवाकोटमा एमालेको जिल्ला कमिटी अधिकतमा १४२ सदस्यीय हुने र त्यो भन्दा धेरै संख्या नहुने एमालेको बागमती प्रदेश कमिटीका अध्यक्ष केशवराज पाण्डे बताउँछन् । जिल्ला अधिवेशनले ११९ सदस्यीय कमिटी हलबाट अनुमोदन गरेर त्यहि हलबाट पादधिकारी चयन गरेको थियो । तर जिल्ला अध्यक्ष बद्री मैनालीसँग जिल्ला कमिटी सदस्य भनेर धेरै लामो सूची रहेको छ ।

अधिवेशनपछि २५० सदस्यीय कमिटीको सपथ गराइएको थियो । जिल्ला अधिवेशनबाटै निर्वाचित भएको भन्दै निर्वाचन समितिले प्रति व्यक्ति तीन हजार रूपैयाँ लिएर सपथ गराएको थियो । 

तर पछि केन्द्रीय नेतृत्वको चेतावनीपछि एमालेले ११९ सदस्यीय भन्दा बाहेकको कमिटी नभएको भन्दै गोप्य रूपमा जिल्ला कमिटीको छोटो सूची बनाएर बाँडिएको नेताहरूले बताएका छन् । अध्यक्ष मैनालीले सपत ग्रहण कार्यक्रमकै दिन वरिष्ठ उपाध्यक्ष ईश्वर पोखरेल र महासचिव शंकर पोखरेलको नाम नै लिएर जिल्ला कमिटीको संख्या आवश्यकता अनुसार बढाउन अनुमति पाएको भाषण नै ठोकेका थिए ।  

विदुरको एक होटलमा ३ हजार रूपैयाँ तिरेर सपथ खाएका कतिपय भने केही दिनमै जिल्ला कमिटीबाट मुक्त भएका छन् । एमालेको विधान अनुसार जिल्ला अधिवेशनबाट निर्वाचित हुनका लागि निर्वाचन समितिले तोकेको फारम भरेर ३ हजार रूपैयाँ तिर्नुपर्छ । फारमको शुल्क सहित ३१ सय रूपैयाँ तिर्नुपर्ने हुन्छ । 

    तर नुवाकोट एमालेले ३१ सय रूपैयाँ लिएर जिल्ला कमिटीको सदस्यको सपथ त खुवायो तर जिल्ला कमिटीको सूची चाहिँ सार्वजनिक नगरेपछि कार्यकार्ता आक्रोशित छन् । 

    उनीहरूले अधिवेशनको हलबाट निर्वाचित भएका ११९ जना भन्दा बाहेकका सदस्यसँग उठाइको ३१ सय रूपैयाँ फिर्ता गर्न‘पर्ने बताएका छन् । सपथको समयमा नेकपा एमालेका केन्द्रीय सल्लाहकार परिषद्का सदस्य महेन्द्र पाण्डे र जिल्ला इन्चार्ज विन्दा ढुङ्गानाको समेत उपस्थिति थियो । तर सात महिनासम्म जिल्ला कमिटीको सूची गुपचुप राखिएको छ ।

    नेकपा एमाले जिल्ला कमिटी नुवाकोटका उपसचिव निलकण्ठ आचार्यले अहिले १६५ जनाको कमिटी रहेको जानकारी दिएका छन् । उनले ४१ जनाको नाम जिल्ला कमिटीमा राख्नका लागि अनुमोदनका लागि प्रदेश कमिटीमा पठाइएको जानकारी दिए । उनले जिल्ला कमिटीको बैठकका १६५ जना नै उपस्थित हुने गरेको दावी गरेका छन् । 

च्वाडी र चन्द्रज्योतीलाई उपाधी


पिपल्टार । पिपलटार फुटवल क्लवद्वारा आयोजित पिपलटार कप फुटसल प्रतियोगिता शनिवार सम्पन्न भएको छ । २० टिम सहभागी प्रतियोगिताको छात्र तर्फ च्वाडी पब्लिक मावि र छात्रा तर्फ चन्द्रज्योती मावि पिपल्टारले उपाधी जितेको छ । छात्र र छात्रा तर्फको दुवै फाइनल खेलमा अर्किड एकेडेमी बट्टारले हार ब्यहोरेको हो ।

प्रतियोगिताको समापन कार्यक्रम एकीकृत समाजवादिका पोलिटव्युरो सदस्य तथा पुर्व संसद राजेन्द्र लोहनी, विदुर नगरपालिका वडा नं. ५ का अध्यक्ष लिलानाथ न्यौपानेले विजेता र उपविजेतालाई पुरस्कार र प्रमाणपत्र प्रदना गरेका थिए । विजेता टिमले नगद सात हजार, ट्रफी र मेडल तथा प्रमाणपत्र प्राप्त गरेको छ । त्यस्तै, द्धितिय हुने टिमले नगद ३ हजार, ट्रफी, मेडल र प्रमाण पत्र पाएका छन् । छात्रा तर्फ प्रथम हुनेले भने नगद ५ हजार, ट्रफी, मेडल र प्रमाणपत्र तथा द्धितिय हुनेले नगद २ हजार, मेडल, ट्रफी र प्रमाणपत्र प्राप्त गरेको आयोजक पिपलटार फुटबल क्लबका अध्यक्ष उद्धब पनेरुले जानकारी दिएका छन् । 

विदुर नगरपालिकाको वडा नम्बर ५ पिपलटारमा रहेको पिपलटार फुटबल क्लबको आयोजनामा शुक्रवार र शनिवार अन्तर बिद्यालय पिपलटार कप फुटसल प्रतियोगिता भएको हो । प्रतियोगिताको उद्घाटन नेपाली काँग्रेसका केन्द्रिय सदस्य अर्ज‘ननरसिंह केसीले गरेको थिए । उद्घघाटन कार्यक्रममा विदुर नगरपालिकाका मेयर राजन श्रेष्ठ, बेलकोटगढी नगरपालिकाका उपमेयर शिवप्रसाद दाहाल, विदुर नगरपालिका वडा नम्बर ५ का अध्यक्ष लिलानाथ न्यौपाने, नुवाकोटका निमित्त प्रमुख जिल्ला अधिकारी बेदप्रसाद अर्याल, पत्रकार महासंघ नुवाकोटका अध्यक्ष कपिलदेव खनाललगायते खेलक्षेत्र र खेलाडीको विकासको लागि हरेक स्थानीय तहले प्राथमिकतामा राख्नुपर्नेमा जोड दिएका थिए । 


नयाँ ठेक्का लगाउने बाटो खुल्यो


विदुर । रसुवागढी केरुङ नाकाबाट काठमाडौं जोड्ने पुरानो सडकमार्ग पासाङल्हामु मार्गको स्तरउन्नतीको लागि नयाँ ठेक्का लगाउने बाटो खुलेको छ । 

काठमाडौंबाट नुवाकोट र रसुवा पुगेको सबैभन्दा पहिलो र पुरानो सडकमार्गको अदालतको आदेशसँगै स्तरउन्नतीको बाटो खुलेको हो । नुवाकोट, रसुवा लगायतका जिल्लाबाट काठमाडौं जोड्ने महत्वपुर्ण सडक बालाजु–रानीपौवा–त्रिशुली स्तरोन्नतिका लागि नयाँ टेन्डर आह्वानका लागि बाटो खुला भएको हो । लापरबाही गरी वर्षौंसम्म सडक अलपत्र पार्ने कम्पनीहरूमाथि सडक सुधार तथा विकास आयोजना निर्देशनालयले ठेक्का रद्द र कालोसूचीमा राख्ने निर्णयविरुद्धको मुद्दामा काठमाडौं जिल्ला अदालतले विभागकै निर्णयलाई सदर गरेपछि नयाँ टेन्डरको बाटो खुलेको हो । 

ठेकेदार कम्पनीले मुद्दा दायर गरेपछि अदालतले विभागको निर्णय कार्यान्वयन नगर्न अन्तरिम आदेश दिएको थियो । तर, मुद्दामा सुनुवाइ गर्दै काठमाडौं अदालतले अघिल्लो निर्णयको निरन्तरता आवश्यक नरहेको फैसला गरी ठेकेदार कम्पनीमाथि कारबाही गर्ने विभागको निर्णयलाई सदर गरिदिएको छ ।

सडकको दुरावस्थाका कारण नागरिकले सास्ती खेपेपछि प्रतिनिधिसभा अन्तर्गत विकास तथा प्रविधि समितिले साउन ११ मा र त्यसअघि पनि सडक तत्काल निर्माण अघि बढाउन निर्देशन दिएको थियो । विशेषतः नुवाकोटबाट प्रतिनिधित्व गर्ने जनप्रतिनिधिहरू नेकपा माओवादी केन्द्रका सांसद हितबहादुर तामाङ, नेकपा एमालेका सांसद नारायणप्रसाद खतिवडा, नेपाली कांग्रेसका सांसद बहादुरसिंह लामा तामाङलगायतले पनि संसद्मा सडकको बिषयमा आबाज उठाएका थिए । 

अदालतको उक्त फैसलाले सरकारलाई नयाँ बजेटको व्यवस्था गरी काम गर्न बाटो खुलेको छ । यो नुवाकोटको सिसडोल बञ्चरेडाँडामा फोहर लैजाने तथा पर्यटकीय गन्तव्य ककनी जाने एकमात्र सडकमार्ग हो । लामो समयदेखि सडक अलपत्र पर्दा फोहर लान समस्या हुनुको साथै र ककनीको पर्यटकियक्षेत्र नै धरासायी बन्न पुगेको छ । ककनीवासीले भोग्नु परेको पीडा राज्यले नदेखेको गुनासाहरू पटक पटक आइरहँदा यो पटक अदालतको निर्णयसँगै सरकारले केही गर्ने प्रतीक्षामा नुवाकोटवासीहरू देखिएका छन् ।

भारतीय एक्जिम बैंकको ऋण सहयोगमा ५१.१९ किमि दूरीको बालाजु–रानीपौवा–त्रिशुली सडक खण्डको ठेक्का लागेको करिब आठ वर्ष भयो । दुई खण्डमा विभाजन गरेर काम गर्ने गरी यस सडकको स्तरोन्नति सन् २०१४ र २०१५ मा सुरु भएको थियो । भारतको ठेकेदार कम्पनी आरामाली इन्फ्रा पावर लिमिटेड र शैलुङ कन्स्ट्रक्सन जेभी एवं भारतकै दिनेशचन्द्र आर अग्रवाल र नागार्जुन–कोसी एन्ड न्यौपाने जेभीले दुई खण्डको छुट्टाछुट्टै ठेक्का लिएर यसको काम अघि बढाएका थिए । तर अहिलेसम्म बालाजु–रानीपौवा खण्डको प्रगती ५४ र रानीपौवा–त्रिशुली खण्डको प्रगती ४६ प्रतिशत मात्र छ । 

यसबीचमा सरकारले निर्माण कम्पनीलाई बालाजु–रानीपौवा खण्डको म्याद सात पटक थपिदिँदा पनि काममा कुनै प्रगति नदेखिएपछि बालाजु–रानीपौवाको निर्माण कम्पनीसँग गत असार ५ मा ठेक्का सम्झौता तोडेर व्यवसायीलाई सडक विभागअन्तर्गत सडक सुधार तथा विकास आयोजना निर्देशनालयले कालोसूचीमा राखी कारबाही गर्न सार्वजनिक खरिद अनुगमन कार्यालयमा सिफारिस गरेको थियो । 

रानीपौवा–त्रिशुली खण्डको निर्माण कम्पनीसँग पनि २०७७ असार ९ मा ठेक्का सम्झौता तोडिएको हो । उसलाई पनि कालोसूचीमा राख्न आयोजनाले सिफारिस गरेको थियो । उक्त निर्माण कम्पनी अहिले पनि कालोसूचीमै छ । एआईपीएल–शैलुङ जेभीले जिल्ला अदालत ललितपुरमा ठेक्का अन्त्यको निर्णय मान्य नहुने भन्दै मुद्दा दायर गरेपछि सडक स्तरोन्नतिको अन्योलमा परेकोमा अब भने बाटो खुलेको छ । 

अहिले उक्त खण्डमा आयोजना कार्यालयबाट सामान्य मर्मत गरी यातायात सञ्चालनमा सहजीकरण गर्ने काम भइरहेको छ । उक्त खण्डको कुल ठेक्का रकम ३४ करोड ९४ लाख ७१ हजार रुपैयाँ रहेकामा १८ करोड ९५ लाख ४७ हजार रुपैयाँ भुक्तानी भइसकेको छ । 

रानीपौवा–त्रिशुली खण्डमा पनि सुरुदेखि नै काममा प्रगति नदेखिएकाले पटक–पटक म्याद थप्दा पनि प्रगति नभएपछि ठेक्का तोडिएको आयोजना कार्यालयले जनाएको छ । 

यस खण्डको पनि तीन पटक म्याद थप भइसकेको छ । यही खण्डको ठेक्का अन्त्यका सम्बन्धमा सडक विभाग र आयोजनालाई विपक्षी बनाई निर्माण व्यवसायीले उच्च अदालत पाटनमा निर्माण कम्पनीले रिट निवेदन पेश गरको थियो । २०७७ असार १६ मा अदालतले अन्तरिम आदेश जारी गर्दै कालोसूचीमा राख्ने र कार्य सम्पादन जमानत जफतलगायत कारबाही अघि नबढाउन आदेश दिएको छ । पछि २०७८ चैत ८ मा रिटको अन्तिम फैसलाअनुसार निर्माण व्यवसायीको उक्त मुद्दा खारेज भएको र सार्वजनिक खरिद अनुगमन कार्यालयले निर्माण कम्पनीलाई ३ वर्षका लागि कालोसूचीमा राखेको हो ।

रानीपौवा–त्रिशुली खण्डको ठेक्का रकम ५० करोड ४२ लाख ९५ हजार रुपैयाँ छ । यसमध्ये २० करोड ७४ लाख रुपैयाँ भुक्तानी भइसकेको छ ।

२०७९ साल भदौ १३ गतेको सम्पादकीय

 अहिलेसम्म ढलेको लोटा उठाएनन्

विदुर नगरपालिका तीन महिनादेखि पुराना कर्मचारी फालेर आफ्ना मान्छेहरू ‘सेट’ गराउने टेन्सनमा छ । मेयर राजन श्रेष्ठ अघिल्लो मेयर सञ्जु पण्डितले राखेका कुनै पनि कर्मचारी नराख्ने अडानमा छन् । श्रेष्ठले त औपचारिक रुपमै अघिल्लो मेयरले राखेका कर्मचारीहरू हटाउने र आफुले राखेका कर्मचारी पनि पाँच वर्ष पछि हटाए हुने बताइरहेका छन् । एमालेको बहुमत रहेको कार्यपालिकामा समीकरण मिलाउन नजान्दा चालु आर्थिक वर्षका लागि तयार गरिएको बजेटको ‘ब्रेक डाउन’ गरेर कार्यान्वयन गराउन सकेका छैनन् । मेयर श्रेष्ठ अझै पनि कर्मचारी हटाउने र सक्षमका नाममा आफ्ना मान्छे राख्ने टेन्सनमै छन् । 

तादी गाउँपालिकामा अघिल्लो सरकारको अनियमिततालाई टालटुल पार्ने र लुकाउनेमै अहिलेको सरकारको समय खर्च भइरहेको छ । जनप्रतिनिधिबाट विदा भइसकेका अघिल्ला कार्यपालिका सदस्य तथा कर्मचारीहरूलाई चार महिनाको विभिन्न शिर्षकका भत्ता भुक्तान गर्ने दायित्वदेखि काम भएको भन्दा बढी रकम भुक्तानी भएपछि त्यसको ‘उठौती’मा लाग्नुपर्ने जस्ता  भन्नै लाज लाग्ने काम गाउँपालिकामा छ । अझ खरानीटार अस्पतालमा औषधि खरिद गरेको रकम अस्पताल विकास समितिबाट भुक्तान भइसकेको तर व्यवसायीले नपाएको नयाँ घटना चर्चामा आएको छ । तादी गाउँपालिका पनि करारका कर्मचारीकै ‘टेन्सन’मा फसेको छ । आफ्ना कार्यकर्तालाई सेट गराउनै पर्ने दवावमा रहेका र आफ्ना मान्छे व्यवस्थापन गर्ने रणनीतिमा रहेका गाउँपालिका अध्यक्ष सन्तमान तामाङ समेत विदुर नगरपालिकाको जस्तै भुमरीमा छन् । 

तारकेश्वर गाउँपालिकाबाट सिधासिधै भ्रष्टाचारको चित्र बाहिर आउन थालेको छ । डिजिटल बोर्ड खरिद, विज्ञापन प्रकाशनमा कल्पनै गर्न नसकिने बिल तयार हुन थालेका छन् । तीन महिनामै ‘क्वाप क्वाप पैसा खान थाल्यो’ भन्ने टिप्पणी नागरिक स्तरमा हुन थालेपछि त्यसलाई मधुरो पार्न गाउँपालिका अध्यक्ष शिव अधिकारी आफुलाई गाउँपालिकाबाट दुई÷चार लाखको लोभ नभएको भन्दै आफ्नै तर्फबाट ठाउँठाउँमा दानको घोषणा गरेर हिड्न थालेका छन् ।

प्रतिनिधि रुपमा नुवाकोटका तीन स्थानीय सरकारले देखाएको यो चित्र र चरित्रले अप्ठ्यारो भविष्यको संकेत गरेको छ । त्यसो त, चुनावअघि अनेकौं आश्वासन दिएर मतदाता फकाएका स्थानीय तहका जनप्रतिनिधिले काम नगरेको भन्दै जनस्तरमा असन्तोष चुलिँदै गएको छ । तीन महिनाको अवधिलाई अब भर्खरै र थोरै भन्न मिल्दैन । एकातिर सर्वसाधारण चिढिने गरी आलस्य देखाइरहेका जनप्रतिनिधि छन् भने अर्काेतिर जिम्मेवारी लिएको लामो समयसम्म अनेक बहाना गर्दै आएका केही जनप्रतिनिधिको प्रारम्भिक सक्रियता नै विवादमा परेको छ । सर्वसाधारणमात्रै होइन, दलकै कार्यकर्तासमेतले असन्तोष प्रकट गरिरहेको प्रसंगबाट जनप्रतिनिधिको अलमल बुझ्न सकिन्छ । चुनावअघि ज्यादै ठूला नारा लगाएर मत मागेकाहरू अहिले जिम्मेवारीमा छन् । तर, उनीहरूले अहिलेसम्म ‘ढलेको लोटा पनि उठाएका छैनन् ।’

निर्वाचन सम्पन्न भएर ‘छोटे राजाहरूलाई’ पदासिन गराएको तीन महिना बितेको छ । मतदाता तहमा यतिबेलाबाट नै असन्तोष र प्रश्नहरूको थाक छ । तर, त्यसलाई  सम्बोधन गर्लान् कि भन्ने आधार केही छैन । विभिन्न बहाना गर्दै आफ्नो सुस्तता ढाकछोप गर्ने प्रयास गरिरहेका स्थानीय सरकारका कार्यकारीहरूलाई अब अलमल गर्ने बहाना सकिएको छ । त्यसैले तत्कालै केही न केही काम गरेर देखाउनुपर्ने दबाबमा जनप्रतिनिधि छन् । जनस्तरमा ठूलो अपेक्षा छ । 

    केही न केही  गरेर देखाउने दबाब महसुस गरेर निर्णय लिएका जनप्रतिनिधिको निर्णयमा पनि सर्वसाधारणले विरोध प्रकट गरेपछि उनीहरूलाई पनि पहिलो गाँसमै ढुङ्गा लागेको छ । विदुर नगरपालिकाको कर्मचारीमा भएको धमिलो खेल, नीति तथा कार्यक्रममा बहुमत ‘होल्ड’ गरेको पार्टीलाई पाखा लगाएर गरिएको प्रयास बिर्सन लायक छ । यही अवधिमा उल्लेख्य केही काम नभएको समस्या त छ नै, गरेको काममा पनि मेयरको शैली, काम र निर्णय क्षमता विवादमा परेको छ । यसलाई जानकारहरूले मेयरको कार्यकुशलता अभावको संज्ञा दिएका छन् । 

विदुरको वर्तमान अवस्थाको अध्ययनले यो देखाउछ कि, स्थानीय सरकारका प्रमुख र जनप्रतिनिधिले तीन पक्षलाई ध्यान दिनु जरुरी छ । पहिलो जनता तह लगाउने गरी योजना सोच्नै हुँदैन, दोश्रो कार्यपालिकामा बहुमत रहेको राजनीति दललाई चिन्दै नचिन्ने शैली देखाउनु हुँदैन र तेश्रो स्थानीय सरकारको समग्र विकासका लागि सबै पक्षको सहभागिता र उपस्थितिको सुनिश्चितता गराउनु पर्छ । विदुर नगरपालिकाका मेयर राजन श्रेष्ठ जनतालाई बढी सुविधा हुने र राहत हुने योजनामा हात हाल्नुपर्ने अवस्थामा एमालेका काम र योजनाहरू भनेपछि पुर्वाग्राही देखिएका छन् । अघिल्लो मेयर एमालेबाट निर्वाचित भएकै कारण र आफ्नो चुनावी प्रतिस्पर्धा एमालेसंग भएकै कारण उनले यो रणनीति बनाउनु सर्वथा अराजनीतिक र अविवेकी छ । 

दोहोरो मतदाताको नागरिकता छानविन हुने

विदुर । निर्वाचन आयोगको मतदाता नामावलीमा दोहोरो नामावली हुनेको नागरिकता समेत छानविन हुने भएको छ । गत साता विदुरमा भएको एक कार्यक्रममा सरोकारवालाहरूले एकै व्यक्तिले फरक फरक नागरिकता नम्वर राखेर मतदाता नामावलीमा दुईपटक नाम सवावेश गराएको पाइएको बताएपछि जिल्ला प्रशासन कार्यालयले नागरिकतामाथीनै छानविन हुने जनाएको हो । 

नुवाकोटका प्रमुख जिल्ला अधिकारी नारायणप्रसाद रिसालले एकै व्यक्तिको सबै विवरण उही तर नागरिकता नम्वर फरक देखिएको प्रमाण पुगेमा उसलाई तत्काल दोहोरो नागरिकता लिएको मुद्दामा कारबाही थाल्ने बताएका हुन् । जिल्ला निर्वाचन कार्यालयले मंगलवार आयोजना गरेको अन्तरक्रिया कार्यक्रममा पत्रकार महासंघ नुवाकोटका अध्यक्ष कपिलदेव खनालले दोहोरो नामावली रहेकाहरूको सबै विवरण उही नागरिकता नम्वर मात्रै फरक रहेको धेरै उदाहरण भेटिएकोले त्यस्ता ब्यक्तिहरूको नागरिकता दोहोरो रहेको विषयमै कारबाही हुने पर्ने बताएका थिए । स्थानीय तह निर्वाचनमा एकै व्यक्तिको दुईवटा मतदाता नामावली देखिएको, उनीहरू फोटो फरक फरक समयमा खिचिएको पाइएको र नागरिकता नम्वर पनि फरक भेटिएकोले दोहोरो नामलाई एकोहोरो मात्रै कायम गर्ने नभई नागरिकता दुई वटा लिलएको वा झुट्टा नागरिकता विवरण पेश गरेको विषयमा छानविन हुनुपर्ने माग गरेका थिए । 

उक्त विषयलाई सम्वोत्रन गर्दै प्रमुख जिल्ला अधिकारी रिसालले त्यस्ता व्यक्तिहरूको विषयमा लिखित वा मौखिक उजुरी प्राप्त भएपनि तत्कालै दोहोरो नागरिकता लिएको विषयलाई प्राथमितामा राखेर कारबाही हुने बताएका छन् । 

जिल्ला समन्वय समिति नुवाकोटका प्रमुख रजिन्द्रविक्रमसिंह ठकुरीले यस्ता विषयामा राजनीतिक दलको आवरण र शक्तिको दवावमा प्रशासन नपरी बारबाही गर्नु उत्तम हुने बताएका छन् । उनले जुनसुकै राजनीतिक दलको नेता कार्यकर्ताहरू त्यो किसिमको अपराधमा भेटिएपनि खुट्टा नकमाई कारबाही गर्न आग्रह गरेका छन् । 

नेपाली काँग्रेस नुवाकोटका उपसभापति राजु थापाले आसन्न संघीय र प्रदेश सभा निर्वाचनलाई मर्यादित र स्वच्छ राख्नका लागि मतदाता नामावावलीदेखिनै काम थाल्नु पर्ने तर्फ निर्वाचन आयोयको ध्यानाकर्षण गराएका थिए । उनले देखिदाका मसिना घटनाक्रमले नै निर्वाचनमा गम्भिर असर परिरहेको बताएका छन् । नेकपा एमालेका अरुणकुमार श्रेष्ठ, नेकपा माओवादी केन्द्रका उत्तम घिमिरे, उपभोक्ता हित संरक्षण मञ्चका अध्यक्ष ईन्द्रबहादुर पण्डित, लगायतले आसन्न निर्वाचनका लागि निर्वाचन आयोगले तत्कालै गर्नुपर्ने कामहरूको विषयमा सुझाव दिएका छन् । माओवादी केन्द्रका उत्तम घिमिरेले हरेक निर्वाचनबाट गल्ती सच्याउदै परिकृष्त हुनै पर्ने निर्वाचन आयोग परम्परागत रुपमै निर्वाचन गराउने शैलीमा केन्द्रीत रहेको बताए । जसले गर्दा पुराना घटनाहरू दोहोरिने र चुनावलाई निर्वाचन आयोग र सरकारी पक्ष नै मर्यादित बनाउनका लागि दत्तचित्त हुनेगरेको आभाष गर्न नसकेको बताएका छन् । 

नुवाकोट नागरिक समाजका अध्यक्ष बद्रीप्रसाद त्रिपाठीले बेलकोटगढी नगरपालिकामा उम्मेदवारी दिएका व्यक्तिको अन्तिम उम्मेदवार नामावलीमा नामनै नभेटिएको र उम्मेदवारी नै नदिएका व्यक्ति चाँही उम्मेदवार बनेको घटना सुनाउँदै निर्वाचन आयोगले निर्वाचनको समयमा गम्भिर हेलचेक्र्याई गर्ने गरेको बताएका छन् । 

झण्डै दुई लाख ४२ हजार मतदाता

विदुर । नुवाकोटमा स्थानीय तह निर्वाचनपछि ४ हजार ५३७ जना मतदाता थपिएका छन् । यो सगै कुल मतदाताको संख्या २ लाख ४१ हजार ९ सय ७१ पुगेको छ । वैशाख ३० गते सम्पन्न स्थानीय तहको निर्वाचनमा २ लाख ३७ हजार ४३४ मतदाता नुवाकोटमा थिए ।

स्थानीय तहको निर्वाचन पछि नयाँहरूको लागि असार १ गते देखि फोटो सहितको मतदाता नामावली दर्ता गर्न सुरु भएको थियो । नेपाल सरकारले मंसिर ४ गते संघ र प्रदेशको निर्वाचन हुने मिति साउन १९ गते तोकेपछि २० गतेबाट  मतदाता नामावली संकलन कार्य रोकिएको छ । असार १ गतेदेखि श्रावण २० गतेसम्ममा जिल्ला प्रशासन कार्यलय, इलाका प्रशासन कार्यलय सातबिसे र निर्वाचन कार्यालयमा गरी ४ हजार ५३७ जनाले मतदाताको लागि फोटो खिचाएको निर्वाचन कार्यलय नुवाकोटका निर्वाचन अधिकारी जयप्रसाद गौतमले जानकारी दिएका छन् । थप भएका सहित नुवाकोटमा कुल मतदाताको संख्या २ लाख ४१ हजार ९ सय ७१ पुगेको उनले बताए ।

नुवाकोटमा प्रतिनिधि सभा सदस्य  निर्वाचन क्षेत्र २ वटा र प्रदेश सभा सदस्य  निर्वाचन क्षेत्र ४ वटा छ । त्यस मध्ये प्रतिनिधि सभा सदस्य निर्वाचन क्षेत्र नम्बर १ को प्रदेश सभा (क) मा ३१ हजार ६ सय १ पुरुष, २८ हजार ३ सय १८ महिला र अन्य २ गरी ५९ हजार ९२१ जना छन् । 

प्रदेश सभा (ख) मा ३२ हजार १४२ पुरुष, २९ हजार ६२० महिला र १ जना अन्य गरी ६१ हजार ७६३ मतदाता छन् । 

प्रतिनिधि सभा सदस्य निर्वाचन क्षेत्र नम्बर २ को प्रदेश सभा (क) मा ३० हजार ९६२ पुरुष र २९ हजार ७४ महिला गरी ६० हजार ३६ जना मतदाता छन् । प्रदेश सभा (ख) मा  ३० हजार २१७ पुरुष र ३० हजार ३४ महिला गरी ६० हजार २५१ मतदाता छन् । 

संघ र प्रदेशको निर्वाचनलाई लक्षित गरी यहि भदौँ १२ गतेदेखि १९ गतेसम्म मतदाता नामावली अद्यावधिक कार्यक्रम सञ्चालन भइरहेको छ । जिल्लामा रहेका सबै मतदाताहरूको विवरण निर्वाचन आयोगबाट प्राप्त भइसकेकोले उक्त विवरण स्थानीय तह र सबै वडा कार्यलयहरूमा टाँस गर्नको लागि उपलव्ध गराउने निर्वाचन अधिकारी गौतमले जानकारी दिएका छन् । 

नुवाकोटको १२ स्थानीय तहमा १ सय ३२ मतदान स्थान र २ सय ८७ वटा मतदान केन्द्र कायम गरिएको छ ।

२०७९ साल भदौ १३ गते । वर्ष : १५, अंक : ४३

 





तस्बिर समाचार

एक सातादेखी त्रिशुली नदीमा हराइरहेका देविघाटका एक वृद्धको खोजीका लागि सशस्त्र प्रहरी बलका खोताखोर टोली त्रिशुली नदीमा । तस्बिर : इमेज

 

मौरी पालकको महासंघ गठन

उपप्रमुख दलबहादुर तामाङ

बट्टार । मौरी पालक कृषकहरूको छाता संस्था शनिवार नुवाकोटमा समेत गठन भएको छ । नेपाल मौरी पालक महासंघको नुवाकोटमा जिल्ला शाखा गठन भएको हो । 

प्रथम साधारण सभा तथा प्रथम अधिवेशनले भिमप्रसाद अधिकारीको अध्यक्षतामा कार्य समिति चयन गरेको छ । समितिको बरिष्ठ उपाध्यक्षमा बेगबहादुर बोगटी, उपाध्यक्षमा बिष्णुप्रसाद सिलवाल, महासचिवमा रामचन्द्र भण्डारी, सचिवमा गंगा तामाङ र कोषाध्यक्षमा सीता घिमिरे पाण्डे चयन भएका छन् । कार्य समितिका सदस्यहरूमा तुलकुमार अधिकारी, रामकृष्ण थापा, गौतम न्यौपाने, लालबहादुर लामा, अर्जुन गुणी, भद्रबहादुर राना र शिवराम न्यौपाने छन् । 

त्यस्तै केन्द्रीय प्रतिनिधिहरूमा भिमप्रसाद अधिकारी, रामचन्द्र भण्डारी, सीता घिमिरे पाण्डे, शैलेन्द्र लामा, रामकृष्ण थापा र अर्जुन गुणी चयन भएका छन् । केन्द्रीय महावेशन यही भदौ २३ र २४ गते हुँदै छ । 

अधिवेशन तथा साधारण सभाको उद्घाटन समारोहमा बोल्दै कार्यक्रममा प्रमुख अतिथि जिल्ला समन्वय समिति नुवाकोटका उपप्रमुख दलबहादुर तामाङ मौरी पालन वातावरणका लागि समेत अत्यावश्य रहेको बताए । मह उत्पादनका लागि मात्रै नभई वातावरणमा सन्तुलन कायम राख्नका लागि समेत ‘एक घर एक मौरी धार’ अभियान आवश्यक रहेको उनले बताए । त्यसका लागि हरेक घरले चिउरीको रुख रोप्ने र प्रत्यक घरमा कम्तिमा एक धार मौरी पालन अनिवार्य गर्ने अरी स्थानीय सरकारहरूले नीति ल्याउनपर्ने बताए । उपप्रमुख तामाङले त्यसका लागि नुवाकोटका १२ वटै पालिकाका सरकारसंग आवश्यक सहजिकरण र छलफल जिल्ला समन्वय समितिले गर्ने बताएका छन् । 

कार्यक्रममा पत्रकार महासंघ नुवाकोटका अध्यक्ष कपिलदेव खनालले नुवाकोटको पैसा नुवाकोटमै राख्न सकिने गरी महासंघले नीति र ठोस कार्यक्रम बनाउनु आवश्यक रहेको बताए । 

कृषकहरूले उत्पादन गरेको मह प्रति माना ९००/१००० मुल्य हुँदा बजारमा प्रतिष्ठित कम्पनीहरूले प्रति केजी सात सय रुपैयाँमा दिँदा महका उपभोक्ताहरू सस्तोमा लागेकोले मह सम्वन्धी सचेतना कार्यक्रमको आवश्यकता रहेको उनले बताए । अहिलेको पुस्ताले महको स्वाद र रंगलाई समेत ठिक रुपमा पहिचान गर्न नसक्ने बेला भइसकेकोले महको विषयमा चेतनामुलक अभियानको नै आवश्यकता परेको अध्यक्ष खनालले औल्याएका छन् ।  

झण्डै दुई दशकदेखि मौरी पालन गर्दै आएको मौरी पालनका प्रशिक्षक रामहरि पाण्डेले नुवाकोटमा मौरी पालनको ब्यवसायीक सुरुवात देखि हालसम्मको आवस्थाको बारेमा कार्यक्रममा जानकारी गराएका थिए । 

रैथाने जातका मौरी अरिङ्गालबाट जोगिनसक्ने भएपनि आयातित जातका मौरीहरू अरिङ्गालका कारण मर्ने गरेको उनले सुनाए । नुवाकोटमा २० वर्ष पहिला ब्यवसायीक रुपमा आफुले सुरु गरेको अभियानको क्रममा र अहिले जिल्लामा ब्यवसायीक मौरी पालनको अवस्थामा खासै ठुलो अन्तर नआएकोमा उनले दुखेसो पोखे ।

कर्मचारी चलाउदैमा बित्यो तीन महिना

विदुर नगरपालिकाका मेयर राजन श्रेष्ठ नगरपालिकाको कार्यकक्षमा । 

विदुर । विदुर नगरपालिका प्रमुख (मेयर) राजन श्रेष्ठले कार्यकालको सपथ लिएको तीन महिना भएको छ । जेठ महिनाको आधाआधीबाट मेयरको कुर्चीमा बसेका श्रेष्ठको पहिलो निशानामा करारका कर्मचारी परे । आफ्नै अकर्मण्यताका कारण नगर सभालाई फालामको चिउरा बनाएका उनले अहिलेसम्म त्यो चिउरा चपाउन सकेका छैनन् । करारका कर्मचारी हटाएर आफ्ना मान्छे नियुक्त गर्ने उनको ‘ओपन सेक्रेट’ ले अहिलेसम्म निरन्तरता पाइरहेको छ । 

त्यसो त, नेपाली काँग्रेसको पनि एउटा गुटका कार्यकर्ताहरूको मात्रै भती केन्द्र बनाउने मेसो मिलाउन थालेपछि काँग्रेसहरूबाटै बिरोधको आबाज आउन थालेको छ । 

हाल नगरपालिका भित्र स्वंयमसेबक शिक्षकको नाममा काम गर्दै आएका सबै शिक्षकहरूलाई हटाएर पुनः नयाँ भर्र्तको लागि सूचना प्रकाशित गरेसँगै काँग्रेसको भर्ती केन्द्रको रुपमा नगरपालिकालाई विकास गर्न लागेको आरोप लाग्न थालेको छ । यसअघि करारमा राखिएका कर्मचारीहरू अधिकांशलाई निकालिएको छ । उक्त स्थानमा कसरी आफ्ना कार्यकर्ताहरू राख्ने भन्ने बिषयमा मेयर श्रेष्ठ काँग्रेस निकट कर्मचारी संघसँग परामर्शमा छन् । खुल्ला प्रतिष्पर्धाको नाममा आफ्ना कार्यकर्ताहरूलाई ‘सेटल’ गर्न श्रेष्ठले पुराना करारका कर्मचारीहरू हटाईएका थिए । हटाईएका मध्येबाट पनि आफु अनुकुलका ‘कर्मचारी जस्ता देखिने कार्यकर्ता’लाई पुनः कार्यालयमा बोलाएर अहिलेनै दैनिक ज्यालादारीमा हाजिरी गराइरहेको सुन्नमा आएको वडा नं. २ का अध्यक्ष दीपक कायस्थले बताए । 

आफु अनुकुल रहेका कर्मचारीहरूलाई नगरपालिकाको बिभिन्न शाखामा र वडा कार्यालय सम्म पठाएर दैनिक ज्यालादारीमा गराएर काममा लगाउदै आएको नगरपालिकाकै एक कर्मचारीले बताएका छन् । असार मसान्तमा करारमा रहेका कर्मचारीहरू हटाउदै अर्को सूचना पछि मात्रै कर्मचारीको ब्यबस्थापन गर्ने भनिएपनि आफु अनुकुल रहेकाहरूलाई साउन १ गतेबाटै कार्यालयमा दैनिक ज्यालादारीमा मेयर श्रेष्ठले गोप्य रुपमा राखेका छन् । ‘हामीले हाजिरी कापी हेर्दा स्थायी कर्मचारीहरूको मात्रै हाजिरी भएको देखिन्छ, तर करारका कर्मचारीहरू दैनिक रुपमै हाजिर गर्छन्, वडा नं. १ का अध्यक्ष लेलिन रञ्जित भन्छन्– ‘ति कर्मचारीहरूको हाजिरिकापी नै गोप्य राखेको बुझिएको छ ।’

दुई आर्थिक बर्ष अगाडीदेखि विभिन्न बिद्यालयमा काम गरिरहेका स्वंयमसेबक शिक्षकको ब्यबस्था नगरपालिकाले गर्दै आएको छ । हाल उनीहरू सबैलाई हटाएर ४० जना स्वंयमसेबक शिक्षकहरू सूचना मार्फत् माग गरेको हो । 

    २० जना माध्यमिक तह र २० जना आधारभुत तहको लागि माग भएको नगरपालिकाका प्रमुख प्रशासकीय अधिकृत बिनोदकुमार खनालले बताए । विदुर नगरपालिकाले गएको बुधवार ४० जना शिक्षक माग गरेको हो । 

तर मेयर राजन श्रेष्ठले भने यसअघि नगरपालिकाको मातहतमा रहेका नगर स्वंयमसेवक शिक्षकहरूको करार अवधि सकिएकोले नयाँ नियुक्तिको प्रक्रिया थालिएको प्रतिक्रृया दिएका छन् । 

लामो समयदेखि कार्यपालिकाको बैठक समेत राख्न नसकेका मेयर श्रेष्ठको एक्लो लहड र सुरमा संस्थागत गतिविधि हुँदै आएको छ । विदुर नगरकार्यपालिकामा नेकपा एमालेको बहुमत छ । 

यसै बीच, काँग्रेसबाट निर्वाचित मेयर राजन श्रेष्ठलाई काँग्रेसभित्रैबाट पनि ‘चेतावनी’ आउन थालेको छ । पार्टीको एउटा गुटलाई मात्र लिएर हिडेको आरोप उनलाई छ । ‘सिमित ब्यक्तिहरूको झुण्डले घेरिएका मेयर श्रेष्ठ उनीहरूकै सल्लाहमा कार्य सम्पादन गर्दै आएका छन्’ काँग्रेसका एक नेताले भने । उनका अनुसार चुनावमा आर्थिक दान गरेका ब्यक्तिहरूको घेरामा मेयर श्रेष्ठ छन् । 

राजनीतिमा सिकारु देखिएकाहरू मेयरको हर्ताकर्ता बनेर काम गराउन थालेपछि भविष्यको राजनीति संकटमा पर्न सक्ने भन्दै काँग्रेसका पुराना कार्यकर्ताहरू मेयरको छेउछाउ पर्न छाडेका छन् ।

काँग्रेसलाई उम्मेदवार पाउन मुस्किल

विदुर । विदुर खानेपानी तथा सरसफाई उपभोक्ता संस्थाको नेतृत्व परिर्वतनका लागि यही भदौ २२ गते आठौ अधिवेशन हुँदै छ । यसका लागि ठूला राजनीतिक दलहरू आन्तरिक गृह कार्यमा जुटेका छन् । यसपटकको चुनावमा नेपाली काँग्रेस–माओवादी केन्द्र र नेकपा एमालेबीच मुख्य प्रतिस्पर्धा हुने देखिएको छ । 

सत्तागठबन्धनमा रहेको एकीकृत समाजवादी पार्टीले भने गठबन्धनमा सहभागी नहुने घोषणा गरेको छ । जिल्ला उपसचिव उद्धव पनेरुले बोग्लै प्यानल बनाउने घोषणा गरेका छन् । माझिटारको च्वाडी पब्लिक माविको ब्यवस्थापन समिति गठनमा काँग्रेसले दपेटेकै कारण समाजवादीले काँग्रेसलाई समर्थन नगर्ने मनस्थिति बनाएको बुझिएको छ । काँग्रेसबाट निर्वाचित विदुर नगरपालिकाका मेयर राजन श्रेष्ठले गठबन्धनको मर्मलाई समेत ख्याल नगरेर ब्यवस्थापन समिति गठनमा नाङ्गो हस्तक्षेप गरेको भन्दै समाजवादीका नेता तथा कार्यकर्ताहरूले औपचारिक रुपमै असन्तुष्टि जनाउँदै आएका छन् । 

काँग्रेस–माओवादीले चुनावका लागि कार्यदल बनाएको भएपनि छलफलमा भने जुटिसकेको छैन । मुख्य दलका नेताहरू काठमाडौं भएको र उनीहरू मंगलवारसम्म जिल्ला आएपछि पद भागबण्डा देखि अन्य विषयमा छलफल आरम्भ हुने बताइएको छ ।   समाचार श्रोतका अनुसार काँग्रेसले अध्यक्ष लिने, उपाध्यक्ष र सचिव माओवादीलाई दिनेगरी अनौपचारिक छलफल चलिरहेको छ । त्यसो हुँदा काँग्रेसका छत्रबहादुर डंगोल अध्यक्षको उम्मेदवार हुने छन् । उपाध्यक्षमा माओवादीबाट रघुनाथ रिमाल, भोजराज पनेरु र रामहरि घिमिरे मध्ये एक जना उम्मेदवार बन्ने छन् । हाल कार्य समितिमा सचिव समेत रहेका रिमाल भने कुनै पनि पदमा उम्मेदवारी दिन इच्छुक छैनन् । 

काँग्रेसमा समेत अध्यक्षको उम्मेदवार बन्न ‘सच्चा ईच्छा जाहेर गर्ने’ को अभाव भएको बताइएको छ । सुरुमै पराजित हुने मानसिकताका कारण काँग्रेसभित्रै अध्यक्ष उठ्नेको अभाव भएको हो । संस्थाको विधान अनुसार एक कार्यकाल कार्यसमितिमा भएका व्यक्तिमात्रै अध्यक्ष, पदाधिकारीको उम्मेदवार हुन पाउने व्यवस्थाले काँग्रेसलाई उम्मेदवार भेट्याउन मुस्किल परेको हो । डंगोल, अघिल्लो पटक नारायणबहादुर खनालसंग पराजित राजेन्द्र अर्याल र एक कार्यकाल सदस्य भएका बद्रीप्रसाद त्रिपाठी मध्ये एकलाई अध्यक्ष बनाउने चर्चा बजारमा छ । चुनाव जित्ने बलियो आधार नभएकै कारण बलियो दाबी पेश गर्नेहरू नभेटिएपछि डंगोलले ‘पार्टीका लागि हारेपनि म उठ्छु’ भनेर नेतृत्व तहमा वचन दिएका छन् ।  

एमालेको तर्फबाट सञ्जिबहादुर श्रेष्ठको नेतृत्वमा टिम तयार हुने बताइएको छ । श्रेष्ठ अहिले उपाध्यक्ष छन् । सुरुमा बाम गठबन्धको प्रयास गरेका श्रेष्ठले अहिले खानेपानीमा ठुलो राजनीतिक मुद्दा स्थापित गरेर बखेडा गर्न नहुने बताउदै काम गर्नेहरूको टिम तयार गर्ने बताएका छन् । एमाले भने अन्य पार्टीको रणनीतिको स्वरुप आएपछि मात्रै योजना बनाउन प्रतीक्षा गरिरहेको छ ।

संस्थामा कत्ति मतदाता कामय भएका छन् भन्ने चाँही दुई दिनमा टुङ्गो लाग्ने अध्यक्ष नारायण खनालले जानकारी दिए । पुराना धाराहरूको नविकरणको अध्यावधिक भइरहेकोले ढिला भएको हो । २४ सय पुराना धारा मध्ये नविकरण नभएका धाराको विवरण हेर्ने काम भइरहेको छ । झण्डै १५ सय धारा नयाँ थपिएको छ । तत्काल ३८ सय हाराहारीमा देखिएको भएपनि पुराना धाराको विवरण निकाल्दा घटेर ३५ सय हाराहारीमा मतदाता हुने अनुमान छ । 

बट्टार क्याम्पसलाई बागमतीस्तरीय बनाउन माग

सांसद हिरानाथ खतिवडा

बट्टार । नुवाकोट आर्दश बहुमुखी क्याम्पसलाई बागमती प्रदेशस्तरीय विश्व विद्यालयका रुपमा विकास गर्नका लागि आवश्यक प्रक्रियाको सुरुवात गर्न सरोकारवालाहरूले माग गरेका छन् । 

शनिवार क्याम्पस प्राङ्गणमा भएको सातौं क्याम्पस सभामा सहभागि सभा सदस्य तथा अतिथिहरूले जिल्लाको गहनाको रुपमा रहेको क्याम्पसलाई प्रदेशस्तरीय बनाएर गरिमा थप उचो पार्नुपर्ने बताएका हुन् । कार्यक्रमका प्रमुख अतिथि प्रदेश सभा सदस्य एवं माओवादी केन्द्रका नेता हिरानाथ खतिवडाले नुवाकोट आर्दश बहुुमुखी क्याम्पसलाई प्रदेशस्तरीय विश्व विद्यालयका रुपमा विकास गर्न सकिने बताएका छन् । त्यसका लागि गर्नुपर्ने आवश्यक काम र तयारीका लागि आफु र आफ्नो पार्टी तयार रहेको उनले बताए । सांसद खतिवडाले भने– ‘म आफैं पनि यो क्याम्पसको विद्यार्थी हुँ, म पहिलो ब्याजको हुँ, आफुले अध्ययन गरेको यो शिक्षालयलाई वृहत्तर हुने गरी फैलाउन र विश्व विद्यालयका रुपमा स्थापना गर्न म हरदर तयार रहने छु ।’ 

क्याम्पस सञ्चालक समितिका अध्यक्ष श्रीराम श्रेष्ठले क्याम्पसको भौतिक तथा गुणस्तर विकासका साथमा जिल्लाबाहिर पनि ख्याती फैलाउनका लागि आफ्नो कार्यकालमा प्रशस्त काम गर्ने प्रतिवद्धता व्यक्त गरेका छन् । ‘त्यसका लागि हामीले विश्व विद्यालयका रुपमा क्याम्पसलाई वृद्धि गर्ने परिकल्पना गरेका छौं’ उनले भने ।

कार्यक्रममा नेपाली काँग्रेस नुवाकोटका उप सभापति राजु थापाले कुनै समय तीन जिल्ला (नुवाकोट, रसुवा र धादिङ) को उच्च शिक्षा लिने एक मात्रै क्याम्पसको रुपमा रहेको उक्त क्याम्पसलाई समय अनुसारको ‘अपग्रेट’को आवश्यकता रहेको औल्याएका छन् । समय अनुसारको शिक्षा र शैलीलाई नअपनाउदा कत्तिपय क्याम्पसहरू धरासायी भएको अरुको उदाहरण हेरेर पनि बट्टार क्याम्पसले आफुलाई सोही रुपमा विकास गर्नुपर्ने सुझाव उनको रहेको छ । 

जिल्ला समन्वय समितिका उपप्रमुख दलबहादुर तामाङले उक्त क्याम्पसबाट उत्पादन भएका विद्यार्थीहरू अहिले उच्च ओहोदामा पुगिसकेकोले त्यसको इतिहास र मर्मलाई गम्भिरताका साथ लिन र हेर्न आग्रह गरे । २०४२ सालमा स्थापना भएको क्याम्पसबाट उत्पादन भएको वृद्धिजिवीले जिल्लाको र मुलुकको विभिन्न ओहोदा प्राप्त गरेकोले यसलाई भविष्यमा निरन्तता दिनका लागि समेत अझ नविनतम् योजना सहित क्याम्पसलाई चुस्त राख्न सञ्चालक समितिलानई उनले आग्रह गरेका छन् । 

कार्यक्रममा तारकेश्वर गाउँपालिकाका अध्यक्ष शिब अधिकारीले बर्षेनी गाउँपालिकाको तर्फबाट क्याम्पसलाई एक लाख रुपैयाँ सहयोग गर्ने प्रतिबद्धता जाहेर गरेका छन् । त्यस बाहेक आफ्नो ब्यक्तिगत खर्चबाट बार्षिक ५० हजार रुपैयाँ क्याम्पसको एक उत्कृष्ठ प्राध्यापकलाई पुरस्कृत गर्न उपलब्ध गराउने पनि उनले घोषणा गरेका छन् । 

कृषि बीमामा कृषकको सक्रियता बढ्यो

विदुर । कृषि बीमा प्रति लिखु गाउँपालिकाका किसानहरूको सक्रियतामा वृद्धि भएको छ ।  गाउँपालिकाले कृषि र पशु पालन व्यवसायमा वृद्धि गरी सम्मुनत लिखुको विकास गर्ने उद्देश्यले दुई बर्षदेखि कृषि र पशु पक्षी बीमा शुल्कमा ५० प्रतिशत अनुदान कार्यक्रमलाई निरन्तरता दिइरको छ । 

गाउँपालिकाका अध्यक्ष धु्रव श्रेष्ठका अनुसार आ.व. ०७८÷७९ मा ८९५ कृषकको १३४ गाई, ८१९ भैँसी, ५१५ बाखा, ११७ बङ्गर गरी कुल नौ करोड ७८ लाख १४ हजार रुपैयाँबराबरको बीमाङ्क रकमको पशुधनको बीमा भएको छ । 

पशुको बीमा गर्दा पशु प्राबिधिक कृषकको गोठ÷फर्ममा गई पशको स्वास्थ्य परीक्षण  गरी स्थानीयस्तरमा खरिद–बिक्री गर्दा पाउने रकमलाई आधार मानेर मूल्य निर्धारण गरेर बीमा गर्ने र बीमा गरेको पशुधन १५ दिनभित्रमा दुर्घटना ाहेक अन्य कारणबाट क्षति भएमा क्षती दाबी नलाग्ने प्रावधान रहेको छ । 

साथै, बीमा गरेको कृषि बाली क्षती भएमा सात दिनदेखि १५ दिनभित्र बीमा कम्पनीमा खबर गर्न‘पर्ने र पशुपंक्षी बीमाको हकमा तीन दिन भित्र लिखित निबेदन पेश गर्नुपर्ने छ । 

क्षति भएको आवश्यक कागजपत्र १५ दिनभित्र कार्यालयमा आएमा २१ देखि ३५ दिनभित्र क्षति दाबी ९० प्रतिशत भक्तानी सम्बन्धित कृषक÷फर्मलाई कम्पनीले दिने गरेको छ । 

यसै बीच, नुवाकोट जिल्लामा पछिल्ला वर्षमा कृषि तथा पशुपंक्षी र बाली बीमा कार्यक्रम प्रभावकारी बन्दै जानुमा कृषक÷फर्म व्यवसायीमा चेतनाको विकास, विगतका दिनमा बीमा कम्पनीले जिल्लामा प¥याएको सेवा मुख्य रहेको कृषि ज्ञान केन्द्रले जनाएको छ । 

स्थानीयस्तरमा सञ्चालनमा रहेका डेरी, सहकारी, सञ्चारमाध्यम, सङ्घ–संस्था, गाउँपालिका, नगरपालिका, भेटेरिनरी अस्पताल तथा पशुसेवा विज्ञ केन्द्र, लगायतको सहकार्यमा बीमा कार्यक्रम सफल भएको केन्द्रले जनाएको हो ।  

कृषि तथा पशुपंक्षीको र उत्पादन र लागतमा बीमा गर्न सकिने बीमा गराउँदा बिउ नै रोपेको हो भने १० दिनभित्र र बेर्ना रोपेको हो १५ दिनभित्र बीमा गर्नुपर्ने, बीमा गर्न कृषि प्रविधिकले तयार पारेको उत्पादन वा लागतमा आधारित भएर गर्न सकिने ब्यबस्था रहेको छ । 

हितबहादुर कि प्रकाशशरण ?

विदुर । नुवाकोटको प्रतिनिधि सभाको निर्वाचन क्षेत्र नं. १ मा नेकपा माओवादी केन्द्र वा नेपाली काँग्रेसको नेतृत्व हुने भन्ने विषयले बढी चर्चा पाउन थालेको छ । आसन्न निर्वाचनमा काँग्रेस–माओवादी गठबन्धन हुँदा कसको भागमा क्षेत्र नं. १ पर्ने भन्नेमा कार्यकर्ताको आ–आफ्नो अनुकुलको तर्क रहेको छ भने नेताहरूले आफुले नै पाउनुपर्ने दावी पेश गरिरहेका छन् । 

माओवादी केन्द्रका नेता हितबहादुर तामाङ र काँग्रेसका नेता डा. प्रकाशशरण महतले निर्वाचन क्षेत्र नं. १ मा आफु नै हुने कारण पेश गरेका छन् ।   

प्रतिनिधिसभाका सांसद एवं माओवादी केन्द्रका पोलिटव्युरो सदस्य हितबहादुर तामाङले गठबन्धन भए पनि कुनै हिसाबले नेकपा माओवादी केन्द्रले नुवाकोट क्षेत्र नम्बर १ नछाड्ने बताएका छन् । तामाङले २०७४ सालमा माओवादी केन्द्रबाट आफूले जितेको र तुलनात्मक हिसाबले सोही क्षेत्रमा आफ्नो पार्टी बलियो भएकोले अरुलाई नछाडिने दाबी गरेका हुन् । 

‘दलगत हिसाबमा हितबहादुर तामाङलाई पठाउँछ अथवा अरुलाई पठाउँछ । अलग कुरा हो । नेकपा माओवादी केन्द्रले नुवाकोट निर्वाचन क्षेत्र नम्बर १ पाउनुपर्छ भन्ने अन्त्यसम्मै दाबी हुन्छ । कुनै पनि हिसाबले माओवादी केन्द्रले त्यो निर्वाचन क्षेत्र छाड्दैन’, उनले भने– ‘चुनाव लड्न जाने भनेको सिनियर, जुनियर भनेर हुँदैन । क्रियाशीलता, संगठन बनाउन खटिने र जनताले चाहेको उम्मेदवार हुनुपर्छ ।’ 

‘कि त नुवाकोटबाट माओवादी केन्द्रले पाउँदै पाउँदैन भन्न सक्नु प-यो । माओवादीले प्रतिनिधिससभा प्रतिनिधित्व गर्दैगर्दा त्यो १ नम्बर निर्वाचन क्षेत्रबाहेक हुन सक्दैन’ तामाङले भने । पार्टीले जोसुकैलाई उम्मेदवार पाउन सक्ने भए पनि जनताले आफूलाई नै रोज्ने उनको दावी रहेको छ । उनले भने– ‘जनभावनाअनुसार मेरो पनि दाबी जोडदाररुपमा छ । म कुनै पनि हिसाबले उठ्न पाउनुपर्छ भन्ने मैले आफ्नो दलमा राखेको छु । दलले मलाई अथवा अरुलाई पठाउँछ अलग कुरा ।’

उता, नेपाली काँग्रेसका प्रवक्ता डा. प्रकाशरण महतले नुवाकोटको लागि बाँकी रहेका पूर्वाधार विकास पूरा गर्न काँग्रेसको नेतृत्व आवश्यक रहेको दावी गरे । लिखु गाँउपालिका–४ मा  शुक्रबार आयोजित ‘तिज विशेष कार्यक्रम’लाई सम्बोधन गर्दै प्रवक्ता डा. महतले काँग्रेस नेतृत्वमा यसअघि गरिएका विकासलाई संस्थागत गर्दै बाँकी योजना पूरागर्न आगामी निर्वाचनमा नुवाकोट क्षेत्र नं १ मा काँग्रेसको सक्षम व्यक्ति उम्मेदवारको रुपमा प्रस्तुत हुने बताएका छन् । 

    ‘यसअघि हामी (डा रामशरण महतसमेत) योजना आयोग र मन्त्री हुँदा बनाएका पुल, विद्यालय, स्वास्थ्य संस्थालाई समय अनुकूल सुधार र स्तरउन्नतीको काम पूरा गनै काँग्रेस नेतृत्व आवश्यक छ’, डा. महतले भने– ‘शिक्षामा गुणस्तर, रोजगारको सुनिश्चित, आर्थिकरूपमा उपार्जनसहित बाह्रै महिना चल्ने कालोपत्रे सडकसहित छहरे–टोखा सुरुङ मार्गको अधुरा योजना पूरागर्न योग्यता, क्षमता, पहुँच, इमान र समपर्ण भएको व्यक्ति प्रतिनिधि हुनुपर्ने भएकाले त्यो काँग्रेसमा छ ।’ 

दिगो आर्थिक विकासको लक्ष्य पूरा गर्दै गरिबी निवारणका लागि अहिले कमजोर बनेको अर्थतन्त्रमा सुधार आवश्यक रहेको उनको भनाइ छ । ‘सडक विस्तार र ऊर्जाको उत्पादन बढाउन सक्यो भने मुलुकलाई अर्थतन्त्रमा बलियो बनाउन सकिन्छ’, महतले भने–‘बहुदलीय व्यवस्था, जनताप्रति उत्तरदायी जनप्रतिनिधि भएर आफूले थालनी गरेको सडक, सिँचाइ, खानेपानी, शिक्षा, स्वास्थ्यलगायत कार्यक्रम यो बीचमा रोकिएको छ, त्यो पूरा गर्न नुवाकोटको क्षेत्र नं १ मा काँग्रेसको नेतृत्व अत्यावश्यक छ ।’

माओवादी केन्द्रका नोता तथा सांसद हितबहादुर तामाङले पनि गठबन्धनका तर्फबाट नेपाली काँग्रेसका नेता डा. प्रकाशशरण महत उठ्ने चाहना राख्नुलाई स्वाभाविक रुपमा लिएको बताएका छन् । उनले महत एक पटक प्रत्यक्षतर्फ चुनाव जित्न नसकेको अवस्थामा गठबन्धन भएमा सजिलै जित्ने ठाउँ नुवाकोट १ बाट उठ्ने मनस्थितिमा पुगेको आकलन गरेका छन् । 

‘त्यो क्षेत्रमा जान डा. महत लाललित हुनुहुन्छ । जीवनमा उहाँले एक पटक पनि चुनाव जित्न पाउनुभएको छैन । त्यो हुनाले नुवाकोट जिल्लाको निर्वाचन क्षेत्र १ चाहिँ नेपाली काँग्रेस र नेकपा माओवादी मिल्दाखेरी झन्डै ८० प्रतिशत मत खस्ने वाला छ । माओवादी केन्द्र त्यो क्षेत्रमा तुलात्मक हिसाबले बलियो छ । काँग्रेस बलियो हुने कुरा नै भइहाल्यो । त्यसको आधारमा त्यहाँ जान पायो भने सजिलै जित्न सकिन्थ्यो । जीवनमा एक पटक निर्वाचित सांसदको हैसियतले संसद्मा प्रतिनिध्तव गर्नुपाए हुन्थ्यो भन्ने चाहना उहाँले राख्नुभएको छ त्यो अस्वाभाविक पनि होइन,’ तामाङले भने ।

०७४ निर्वाचनमा तामाङ नुवाकोट १ बाट पूर्वअर्थमन्त्री एवं काँग्रेसका नेता डा. रामशरण महतलाई भारी मतान्तरले पराजित गर्दै सांसद बनेका थिए । गत निर्वाचनपछि झन् माओवादी केन्द्र बलियो भएको अनुमानसहित एक्ला एक्लै भिड्न परे पनि तयारीमा माओवादी नेता, कार्यकर्ता तयार देखिएका छन् ।

१ मा माओवादी २ मा काँग्रेस

विदुर । नुवाकोटको दुई निर्वाचन क्षेत्र मध्ये काँग्रेस–माओवादीबचि एक÷एक क्षेत्र लिनेगरी केन्द्मा छलफल भइरहेको छ । सिट बाँडफाँडका लागि गठित कार्यदलमा त्यसबारे अनौपचारिक समती भएको छ । लिखित हुन बाँकी रहेको र तर अनामैपचारिक रुपमा भएको समहती अुनसार नुवाकोटको निर्वाचन क्षेत्र नं. १ मा नेकपा माओवादी केन्द्र र क्षेत्र नं. २ मा नेपाली काँग्रेसलाई भाग लाग्ने छ । 

यस अघिको निर्वाचनमा एमालले बिजयी भएको संघ र प्रदेशका निर्वाचन क्षेत्रहरू काँग्रेसलाई र माओवादी केन्द्रले जितेको क्षेत्रहरू माओवादीलाई नै कामय हुने सम्भावना रहेको एक नेताले बताएका छन् । उनका अनुसार एकीकृत समाजवादीलाई कसरी व्यवस्थापन गर्ने भन्ने विषयमा समेत छलफल हुन थालेको छ । 

२०७४ को निर्वाचनमा नुवाकोटको क्षेत्र नम्बर–१ मा माओवादी केन्द्रका हितबहादुर तामाङ र क्षेन नं. २ मा एमालेका नारायणप्रसाद खतिवडा निर्वाचित भएका थिए । क्षेत्र नं. १ मा माओवादीबाट भने पुनः हितबहादुर उम्मेदवार बन्ने पक्का छ ।

क्षेत्र नं. २ बाट काँग्रेस नेता अर्जुननरसिंह केसीको दाबी छ । ०४८ सालदेखि सोही क्षेत्रबाट चुनाव लड्दै आएका केसी अघिल्लो निर्वाचनमा बाम गठबन्धनका कारण एमालेका खतिवडासंग पराजित भएका थिए । नेता केसीले शुक्रवारपिपल्टारमा भएको फुटसल प्रतियोगिताको उद्घाटन समारोहमा बोल्ने क्रममा भने आफुले चुनवा उठ्ने वा नउठ्ने विषयमा आधिकारिक धारणा सार्वजनिक नगरिसकेको बताएका छन् । एक महिना अघि विदुरमै भएको कार्यक्रममा भने उनले क्षेत्र नं. २ बाट आफु उम्मेदवार बन्ने बताएका थिए । शुक्रवार नेता केसीले आफुले आफ्ना परिवारका अन्य सबै सदस्यहरुको मतदातानामावली विदुर नगरपालिकामा स्थानान्तरण गरिसकेको बताउँदै क्षेत्र नं. २ मा आफुनै उठ्ने संकेत गरेका छन् । ‘म आजसम्म नुवाकोटबाहेक अन्य क्षेत्रबाट चुनाव लडेको छैन, जे जे गरे यहीको लागि गरे, म नुवाकोट छाडेर अन्त कहि राजनीति गर्न जान्न’ केसीले भने । 

क्षेत्र नं. २ मा काँग्रेसका केन्द्रीय सदस्य बहादुरसिंह लामा तामाङको दावी पनि उत्तिकै रहेको छ । एक पटक यही क्षेत्रबाट प्रत्यक्ष निजर्वाचित भएका लामाले यस पटक पनि आफ्लाई प्रत्यक्ष निर्वाचित हुन रहर लागेको बताएका छन् । उनी अहिले काँग्रेसको समानुपातिक कोटाबाट संघीय सांसद छन् । 

रामेश्वर गजुरेल जिल्ला सभापति

बट्टार । राष्ट्रिय स्वतन्त्र पार्टी नुवाकोटको सभापतिमा बेलकोगढी नगरपालिका नलगाउँका रामेश्वर गजुरेल चयन भएका छन् । गएको आईतवार नुवाकोटमा भएको जिल्ला भेलाले उनलाई जिल्ला सभापति बनाएको हो । 

जिल्ला उप–सभापतिमा लक्ष्मी पाण्डे र सचिब सुवास भण्डारी, विदुर नगरपालिकाको संयोजकमा भरत पुलामी मगरलाई जिल्ला भेलाले चयन गरेको छ । 

उक्त कार्यक्रममा प्मुख आकर्षकका रुपमा उपस्थित पार्टीका केन्द्रीय सभापति रबी लामछिानेले नेपालमा भएका राजनीतिक दलप्रति जनताहरूमा वितृष्णा पैदा भएकोले राष्ट्रिय स्वतन्त्र पार्टीलाई जन्माउनु परेको बताएका थिए ।

बोगटी वाइसिएल केन्द्रीय सदस्य

विदुर । नेकपा माओवादी केन्द्रको युवा संगठन योङ कम्युनिष्ट लिग (वाईसीयल) नेपालको केन्द्रिय सदस्यमा नुवाकोटका दिनेश बोगटी चयन भएका छन् । 

वाईसीएल नेपालको दोस्रो राष्ट्रिय भेलाले केन्द्रिय सदस्यमा दिनेश बोगटीलाई चयन गरेको हो । 

वाईसीयल नुवाकोटका अध्यक्ष समेत रहेका बोगटी नुवाकोटमा लोकप्रिय युवा नेताको रुपमा परिचित छन् ।

खेलकुद महासंघ संयोजकमा सुनार

विदुर । अखिल नेपाल खेलकुद महासंघ नुवाकोटको प्रथम भेलाले कुवेर सुनारको संयोजकत्वमा ३१ सदस्य सम्मेलन आयोजक समिति गठन गरेको छ । 

विदुरमा सम्पन्न भेलाले सचिवमा बिकास गुरुङलाई चयन गरेको छ । नुवाकोटको १२ वटै स्थानिय तहलाई समेटेर सम्मेलन आयोजक समिति चयन गरेको अखिल नेपाल खेलकुद महासंघको केन्द्रिय कोषाध्यक्ष एलिशा थापाले जानकारी दिए । 

भेला उद्घाटन गर्दै नेकपा माओवादी केन्द्र नुवाकोट जिल्ला सह इन्चार्ज तथा बागमती प्रदेश सदस्य हिरानाथ खतिवडाले खेल क्षेत्रको विकास र युवाहरूको खेल क्षेत्र प्रतिको लगावलाई मध्यजनर गर्दै वागमती प्रदेश सरकारले बिशेष योजनाहरू ल्याएको बताए । कार्यक्रममा नेकपा माओवादी केन्द्र नुवाकोट जिल्ला अध्यक्ष पुष्प लामिछाने, अखिल नेपाल खेलकुद महासंघको बागमती प्रदेश सदस्य सुरज थापा, 

अखिल क्रान्तिकारी नुवाकोट जिल्ला अध्यक्ष निराजन बोगटी, जिल्ला खेलकुद विकास समितिका अध्यक्ष सन्तोष राई, नुवाकोट खेलकुद विकास समिति सदस्य सरोज तामाङलगायत सहभागि थिए ।