 |
| प्रहरी कार्यालयमा दर्ता भएको निवेदन |
विदुर । नुवाकोट–काठमाडौं आउजाउ गर्ने छोटो दुरीको टोखा–छहरे सडक खण्डअन्तर्गत शिवपुरी राष्ट्रिय निकुञ्जभित्र एक युवालाई लुटपाट गरिएको छ । बिहीबार राति करिब ९ बजे नुवाकोट शिवपुरी गाउँपालिका–६, फेदीबाट काठमाडौं जाँदै गरेका १९ वर्षीय सबिन तामाङलाई अज्ञात व्यक्तिहरूले निकुञ्जभित्र उनी चढेको मोटरसाइकल रोकी नगद तथा मोबाइल लुटेर भागेका हुन् ।
काठमाडौं तारकेश्वर नगरपालिका–१ मा पर्ने निकुञ्जको जगात वनमा आफू लुटिएपछि तामाङले शुक्रबार प्रहरी वृत्त बालाजुमा उजुरी दिएका छन् । उजुरीमा उल्लेख भएअनुसार नगद ३० हजार, मोबाइल, नागरिकता, शैक्षिक योग्यताको प्रमाणपत्र, ब्लुबुक, लाइसेन्स (सवारी चालक अनुमतिपत्र)जस्ता महत्वपूर्ण कागजात लुटिएको छ । सडक किनारमा बसिरहेका अपरिचित ४ व्यक्तिले बाटो छेकी मोटरसाइकल रोकेको र सँगैका साथी र आफूलाई दाउराले हानेर नगद र कागजात रहेको झोला लुटेर भागेको तामाङको उजुरीमा लेखिएको छ
प्रहरी वृत्त बालाजुका प्रहरी नायब उपरीक्षक (डिएसपी) मनोजजीत कुँवरले लुटपाटको घटनाबारे प्रहरी चौकी टोखा र साङ्लालाई समेत जानकारी गराई अनुसन्धान अघि बढाइएको बताए ।
No comments:
Post a Comment