हटाइए १५ सय दोहोरो मतदाता

विदुर । नुवाकोटमा दोहोरो सूचीमा रहेका एक हजार पाँच सय मतदाता सूचीबाट हटेका छन् । मतदाता नामावली अद्यावधिक गर्ने क्रममा दोहोरो मतदाता नामावली भएकाको सूचीबाट नाम हटाइएको हो ।

जिल्ला निर्वाचन कार्यालय नुवाकोटका अनुसार दोहोरो मतदाता, निधन भएका, नाम फरक, दुई स्थानीय तहमा नामावली रहेको लगायत त्रुटि सच्याउने क्रममा नामावलीबाट सो संख्यामा मतदाता हटाइएका हुन् । जिल्लाका १ हजार ५ सय दोहोरो मतदाताको नामावली हटाइएको कार्यालय प्रमुख जयप्रसाद गौतमले जानकारी दिए । कार्यालयले सञ्चालन गरेको मतदाता नामावली अद्यावधिक सम्बन्धी अन्तर्क्रिरया कार्यक्रममा उक्त जानकारी दिइएको हो । मतदाताले आफ्नो विवरण अनलाइनबाटै अद्यावधिक गर्न सक्ने प्रमुख गौतमले जानकारी दिए । कार्यालयका अनुसार जिल्लामा २ लाख ४० हजार २७८ जना मतदाता छन् ।