बोक्सी आरोप र दुरुत्साहनमा कैद

विदुर । नुवाकोटको उर्लेनी गाउँका का २ जनालाई बोक्सी आरोप तथा दुरुत्साहन मुद्दामा कैद फैसला भएको छ ।

जिल्ला अदालतले पीडितलाई क्षतिपूर्ति तथा राहत दिनुपर्नेसमेत ठहर गरेको छ । बोक्सी आरोप तथा आत्महत्या दुरुत्साहन कसूरमा तादी गाउँपालिका–१ उर्लेनीका ४८ वर्षीय लक्षु तामाङ र ५५ वर्षीय सम्बर तामाङलाई नुवाकोट जिल्ला अदालतले दुवै जनालाई २ वर्ष दुई महिना कैद सजायको फैसला गरेको हो । जिल्ला न्यायाधीश मदनबहादुर धामीको एकल इजलासले आइतबार गरेको अन्तिम फैसलाको अभियोगमा आंशिक दाबी पुग्ने ठहर गर्दै जनही कैद सजाय, २१ हजार ५ सय रुपैयाँ जरिवाना, ५० हजार रुपैयाँ क्षतिपूर्ति र ८६० रुपैयाँ पीडित राहत कोषमा दाखिला गर्ने फैसला भएको नुवाकोट जिल्ला अदालतले जनाएको छ । 

लक्षु र सम्बरले तादी–१ की ५५ वर्षीया सन्चमाया तामाङलाई बोक्सी आरोप लगाएर शारीरिक तथा मानसिक यातना दिएपछि गत २०७७ असोज १६ गते विष सेवन गरेर आत्महत्या गरेको दाबी गर्दै पीडित पक्षले जिल्ला प्रहरी कार्यालयमा असोज १८ गते उजुरी दिएका थिए । सो मुद्दाको अन्तिम फैसला भएको अदालतकी सूचना अधिकारी तथा इजलास अधिकृत रीता लामिछानेले बताइन् । नुवाकोट जिल्ला अदालतले तामाङ द्वयलाई २०७७ कात्तिक १३ गते पुर्पक्षको लागि थुनामा राख्ने आदेश दिएको थियो ।