 |
| भालुको आक्रमणबाट घाइते भएका |
ककनी । शिवपुरी नागर्जुन राष्ट्रिय निकुञ्जबाट झरेको भालुको आक्रमणमा परी ककनी गाउँपालिकाका पाँच जना सख्त घाइते भएका छन् । कननी १ ओखरपौवाका ४ जना स्थानीय र वडा ४ का १ जना गरी ५ जनालाई भालुले आक्रमण गरी घाइते बनाएको वन डिभिजन कार्यालय नुवाकोटका डीएफओ दीर्घनारायण कोइरालाले जानकारी दिए ।
घाइतेहरूको काठमाडौं बसुन्धरास्थित ग्रिनसिटी अस्पतालमा उचपार भइरहेको छ । उनका अनुसार सुरुमा निकुञ्जको जंगलबाट भालु झरेर मध्यवर्तीको सानो जंगलमा बसेको स्थानीयले बँदेल भन्ठानेर हेर्ने र सेल्फी खिच्ने भनेर लाग्दा भालुले एक्कासी आक्रमण गरी गएको बुधबार घाइते बनाएको थियो । ‘२ जनालाई सेल्फी खिच्दा घाइते बनाइदियो,’ उनले भने, ‘चारैतिर खैलाबैला भयो । निकुञ्जमा खबर गरे, भालु भाग्यो । गएको बिहीबार बिहान फेरि एक जना र अर्को सोही जंगलबाट बाटो हिँडिरहेको गरी दुई जनालाई भालुले घाइते बनाएपछि ललितपुरस्थित सदर चिडियाखाना जावलाखेलको उद्धार टोलीले अपराह्न ४ बजे भालु फेला पारेर लठ्याउने सुई लगाई उपचारका लागि जावलाखेल लगेका छन् ।’
भालुले आक्रमण गरी घाइते बनाएको ककनी गाउँपालिकाका अध्यक्ष सुमन तामाङ सज्जनले पनि पुष्टि गरे । उनले ग्रिनसिटी अस्पतालमा पुगेर घाइतेको अवस्था बुझेर आएको बताए । गाउँपालिका अध्यक्ष तामाङका अनुसार एक जना घाइतेको अनुहार नै क्षतविच्छेद भएको, अधिकांशको टाउकोमा र एक जनाको गोडामा चोट छ ।
No comments:
Post a Comment