करणी आरोपमा एक पक्राउ

विदुर । जबरजस्ती करणीको आरोप लागेका नुवाकोट विदुर नगरपालिका १३ का २८ वर्षीय सागर थापा पक्राउ परेका छन् । ६ महिनाभन्दा बढी समयदेखि फरार रहेका उनलाई बाबुको १३ दिनको काजक्रिया सकेलगत्तै प्रहरीले पक्राउ गरेको हो ।

गत असोज २३ गते साँझ साढे ६ बजेको सोही वडाको खर्कटारस्थित सुनसान बाटोमा एक्लै आफ्नो घरतर्फ जाँदै गरेकी एक महिलालाई जबरजस्ती करणी गरेको आरोप लागेका उनी त्यसपछि फरार रहेको जिल्ला प्रहरी कार्यालय नुवाकोटका डीएसपी खगेन्द्रबहादुर खड्काले बताए । विशेष सूचना र खोजतलासको क्रममा प्रहरीले पक्राउ गरी उनलाई नुवाकोट अदालतबाट सात दिनको म्याद लिई अनुसन्धान भइरहेको प्रहरीले जनाएको छ ।