काठमाडौं । राजनीतिक दलहरूले निर्वाचन आयोगमा आम्दानी र खर्चको विवरण प्रस्तुत गरेका छन् । प्रस्तुत गरेको विवरणअनुसार नेपाल कम्युनिस्ट पार्टी (एमाले) सबैभन्दा धनी दल रहेको छ । दोस्रो धनी दलमा राष्ट्रिय प्रजातन्त्र पार्टी देखिएको छ । संसद्को सबैभन्दा ठूलो दल नेपाली काँग्रेस भने घाटामा चलेको छ ।
एमालेबाट विभाजित नेपाल कम्युनिस्ट पार्टी (एकीकृत समाजवादी)ले नौ महिनामा नै सात करोड रुपैयाँभन्दा बढीको सम्पत्ति जोडेको छ । एमाले सबैभन्दा धनी दल रहेको छ । निर्वाचन आयोगमा बुझाइएको विवरणअनुसार सो दलको मौज्दात करिब १३ करोड छ । कुल आम्दानी ४१ करोड छ ।
निर्वाचन आयोगको कानुन तथा राजनीतिक दल व्यवस्थापन महाशाखाका अनुसार ८३ वटा राजनीतिक दलले आय–व्ययको लेखापरीक्षण विवरण समयभित्रै बुझाएका छन् । आयोगमा कुल ११६ दल दर्ता छन् । एमालेको असार मसान्तसम्म ४१ करोड ७२ लाख २० हजार ३१७ रुपैयाँ आम्दानी रहेकोमा १५ करोड ७० लाख ७६ हजार ९८३ रुपैयाँ खर्च छ । कुल आम्दानीमा चल÷अचल सम्पत्तिसमेत गरेर ४१ करोड हुन सक्ने आयोग स्रोतले बतायो । प्रतिनिधि सभामा एमालेले ७८ सिट जितेको छ ।
प्रतिनिधि सभा तथा प्रदेश सभा सदस्य निर्वाचनबाट सबैभन्दा ठूलो दल बनेको नेपाली काँग्रेस भने घाटामा रहेको आय–व्ययको विवरणमा जनाइएको छ । प्रतिनिधि सभामा उसको सिट संख्या ८९ छ । आर्थिक वर्ष २०७८/७९ सम्म सो दलले १४ करोड ८९ लाख ९४ हजार ८७ रुपैयाँ आम्दानी गरेको छ । तर सो दलको खर्च भने १७ करोड ९० लाख ७८ हजार २२२ रुपैयाँ छ । आयोगमा बुझाइएको विवरणबमोजिम काँग्रेसको तीन करोड ८४ हजार १३५ रुपैयाँ दायित्व छ ।
संसद्को तेस्रो ठूलो दल नेकपा (माओवादी केन्द्र) छ तर आयोगमा बुझाइएको विवरणबमोजिम राष्ट्रिय प्रजातन्त्र पार्टी (राप्रपा) भने दोस्रो धनी दल हो । प्रतिनिधि सभामा १४ सिट जितेको सो दलको मौज्दात करिब तीन करोड २१ लाख छ । माओवादी केन्द्रको आय र व्ययको विवरण दुईथरीको पाइएको छ । आम्दानी नौ करोड ८६ हजार ६४ रुपैयाँ छ भने सात करोड ४२ लाख ६४ हजार ४३ रुपैयाँ खर्च छ । करिब एक करोड ५८ लाख मौज्दात छ । अर्कोथरीको विवरणबमोजिम ३२ लाख २१ हजार ९७१ रुपैयाँ बचत छ । २०७८ भदौ १ गते एमालेबाट विभाजित भएको एकीकृत समाजवादीले एक वर्ष नपुग्दै एक करोडभन्दा बढी बचत गरेको छ । १करोड १० लाख ६० हजार ८४८ रुपैयाँ बचत छ । छोटो समाजवादीले करिब सात करोड रुपैयाँभन्दा बढी सम्पत्ति जोडेको छ ।
संघीय संसदमा प्रतिनिधित्व गरेको र मधेश प्रदेशमा लगातार दोस्रो कार्यकालका लागि नेतृत्व गरेको जनता समाजवादी पार्टी नेपालको बचत भने अन्य दलको अपेक्षा थोरै देखिएको छ । सो दलको बचत ११ लाख १८ हजार ८६२ रुपैयाँ छ । दल दर्ता गरेर छोटो अवधिमै निर्वाचनमा प्रतिस्पर्धा गरेका राष्ट्रिय स्वतन्त्र पार्टी र जनमत पार्टीको बचत भने थोरै छ । २०७९ असार ७ गते आयोगमा दर्ताका लागि निवेदन दिएको थियो । गत असार मसान्तसम्म एक महिनाको आय–व्ययको विवरणमा उसले चार लाख नौ हजार ७६० रुपैयाँ आम्दानी देखाएको छ ।
No comments:
Post a Comment