बधशालाको लगानी : बालुवामा पानी

 बधशालाको लगानी : बालुवामा पानी

यो समय डटकमबाट
विदुर । विदुर नगरपालिकामा निर्माण भएको पशु वधशाला अलपत्र परेको छ । विदुर नगरपालिका वडा नं. ४ को सिमचौर नजिकै निर्माण भएको सुविधासम्पन्न बधशाला नगरपालिकाको वेवास्थाका कारण अलपत्र परेको हो ।
    करिव ४ रोपनी जमीनमा फैलिएको बधशाला सञ्चालनको लागि निर्माण हुनुपर्ने मुख्य संरचनाहरू सबै निर्माण भइसकेको छ । बधशाला सञ्चालनको लागि विदुर नगरपालिकामा सञ्जु पण्डित प्रमुख भएको समयमा वधशाला निर्माण भएको हो । वधशाला सञ्चालनको लागि आवश्यक विजुली वत्ति, खानेपानीको व्यवस्थापन, सडक जिर्ण भएको मर्मतसमेत गरी सञ्चालनको लागि तयारी अवस्थामा राखिएको छ । सफा नगरपालिका निर्माणको लागि वधशाला निर्माण आवश्यक छ । तर, बधशाला सञ्चालनको लागि नगरपालिकाले पहल नगर्दा करोडौको लगानी बालुवामा पानी सरह भइरहेको छ भने अर्कोतर्फ सदरमुकाम विदुर र आसपास क्षेत्र अस्वस्थ्य मासुको विक्री वितरणले मानव स्वास्थ्यमा प्रतिकुल असर पुगिरहेको छ ।
    २ करोड रुपैयाँको लागतमा संघीय सरकारको थप एक करोड गरी तीन करोड रुपैयाँको लगानीमा यो वधशाला निर्माण भएको हो । बधशाला निर्माण नहुँदा करोडौँको सम्पत्ति जिर्ण हुन थालेको पूर्व नगर सदस्य वसन्त रिजाल बताउँछन् । बधशाला सञ्चालनपछि हुने आम्दानीले विदुर नगरपालिका क्षेत्रका बासिन्दाहरूको विकास निर्माणमासमेत थप सहयोग पुग्न सक्ने भएपनि नगरपालिकाले बधशाला सञ्चालनप्रति रुचि नदेखाएको रिजाल बताउँछन् ।
    विदुर नगरपालिकाका प्रमुख राजन श्रेष्ठले बधशाला सञ्चालन कसरी गर्न सकिन्छ भनेर छलफलकै क्रममा रहेको र सरोकारवालासँगको छलफलपछि मात्रै बधशाला कसरी सञ्चालन गर्न सकिन्छ भन्न सकिने बताए । ‘म नगरपालिकामा आउनुभन्दा पहिले नै यो वधशाला निर्माण भइसकेको हो’ प्रमुख श्रेष्ठले भने– ‘यसबारेमा विस्तृतमा बुझेपछि मात्रै बधशाला सञ्चालनको ठोस निर्णय गर्न सकिएला ।’
    बधशाला सञ्चालनपछि बधशालाबाट निस्किएका फोहोर बस्तुबाटसमेत रकम आर्जन सकिने उनी बताउँछन् । वधशालामा काटिने र तयार गरी राँगा, बोका, खसी, कुखुराको भुत्ला तथा लादी विसर्जन गर्नको लागि बायोग्यास उत्पादन गर्न सकिने गरी संरचना निर्माण भएको छ । बधशाला सञ्चालनमा ल्याई विदुर नगरक्षेत्रमा दैनिक काटिने पशुपन्छिबाट उत्पादन मासु स्वस्थ्य एवं गुणस्तरीयता कायम गर्न सकिने र नगरपालिकालाई स्वच्छ सफा बनाउन सकिने रिजाल बताउँछन् ।
    बाह्य भौतिक संरचना निर्माण सकिएको झण्डै तीन वर्ष पुग्दासम्म बधशाला सञ्चालनमा आउन सकेको छैन । निर्माण सकिएको लामो समयसम्म भवन सञ्चालनमा नआउँदा भित्ता चर्किएका छन् । बधशालाका लागि ल्याइएका उपकरणसमेत काम नलाग्ने हुँदै गएका छन् ।
    वधशाला सञ्चालनको दायित्व पाएको विदुर नगरपालिकाको बेवास्ताले बधशाला अलपत्र परेको यस क्षेत्रका व्यवसायीहरू बताउँछन् । वधशाला सञ्चालनमा कठिनाई भए वा कुनै कारणले सञ्चालन नै गर्न नसकिने अवस्था सिर्जना भएमा वा बधशाला स‘चालन नभएसम्मका लागि अन्य कुनै प्रयोजनमा लगाएर भएपनि संरचना नष्ट हुनबाट बचाउनुपर्ने धारणा पूर्व वडासदस्य रिजालको भनाई छ । ‘नगरपालिकाले भवन भाडामा लगाउने भनेर सुचना निकाल्यो भनेपनि ठूला ठूला गोदामको रुपमा भाडामा लगाउन सकिन्छ’ रिजाल भन्छन्– ‘वधशाला सञ्चालन नभएसम्मका लागि मासिक दुई लाख रुपैयाँसम्ममा भाडामै पनि यो संरचना लगाउन सकिन्छ ।’ भाडामा लगाएर भएपनि नगरपालिकाले आफ्नो दायित्व पूरा गर्न‘पर्ने विदुरवासीको भनाई छ ।
    बधशाला नभएका कारण नुवाकोटको विदुर, बट्टार, त्रिशूली, कोलोनी तथा आसपासका बजारहरूमा दैनिक बिक्री हुने मासुमध्ये ७५ प्रतिशत अस्वस्थकर रहेको छ । बधशाला सञ्चालनमा ल्याउन सके स्वस्थ्यकर मासु उपभोक्तासम्म पुग्ने थियो ।