तोकियो बसको नयाँ भाडादर

विदुर । सार्वजनिक सवारीले बढी भाडा असुलेको गुनासो बढेपछि जिल्ला प्रशासन कार्यालय नुवाकोटले अनुगमनमा कडाइ गर्ने भएको छ । बुधबार बसेको सार्वजानिक यातायातका सरोकारवाला र यातायात व्यवसायीको बैठकले तोकिएको भाडादरको विवरण यात्रुले प्रष्ट देख्ने गरी नटाँसेको र बढी भाडा लिइएको पाइएमा सवारी साधनलाई कारवाही गरिने जिल्ला प्रशासन कार्यालयका सहायक प्रमुख जिल्ला अधिकारी वेदनिधी अधिकारीले बताए ।
    यात्रुवाहक सवारीहरूले यात्रुले दिने सुविधामा तोकिएअनुसार सेवा सुविधा प्रभावकारी रुपमा कार्यान्वयन गर्नपर्ने निर्णय गरेको छ । प्रत्येक महिनाको १५ र ३० गते अनुगमन गर्ने र सेवामा कमि कमजोरी देखि तत्काल सुधारको लागि सुझाव दिने निर्णय गरेको छ ।
    बैठकले यातायात भाडामा अस्वाभाविक रुपमा असुली गरेको जनगुनासो आएकोले त्रिशूलीदेखि गल्छीसम्मको भाडा एसी बसले १३० रुपैयाँ र अन्यले ११० रुपैयाँ, ढुंगेदेखि बेत्रावतीसम्म ४० रुपैयाँ, त्रिशूली काठमाडौंको एसी बसले ३७० रुपैयाँ र डिलक्स बसको ३१० रुपैयाँ भाडादर निर्धारण गरेको छ ।