बागमती प्रदेश सांसदलाई बजेट

विदुर । सरकारले वाग्मती प्रदेशका सांसदलाई बजेट विनियोजन गरेको छ । सांसदकै अगुवाइमा योजना छनौट तथा सञ्चालन गर्ने गरी आगामी आर्थिक वर्ष २०८०÷८१ मा प्रदेश विकास कार्यक्रम सञ्चालनका लागि प्रदेश सरकारले बजेट विनियोजन गरेको हो ।
    सांसदलाई आफ्नो निर्वाचन क्षेत्रका मतदाताहरूको विकाससम्बन्धी समस्या र गुनासो सम्बोधन गर्ने सहज वातावरण सिर्जना गर्दै लगिने बजेट वक्तव्यमा उल्लेख छ । ‘प्रदेशसभाका सदस्य र स्थानीय तहबीच सुमधुर सम्बन्ध कायम गरी अन्तरतह समन्वय प्रभावकारी बनाउन तथा विकास र शासनलाई थप जनमुखी बनाउन प्रदेशसभाका सदस्यको प्रत्यक्ष सहभागितामा विकास कार्यक्रम र आयोजनाहरू छनोट गरी कार्यान्वयन गर्न प्रदेश विकास कार्यक्रम सञ्चालनका लागि आवश्यक रकम छुट्याएको छु,’ आर्थिक मामिला तथा योजना मन्त्री बहादुरसिंह लामाले भने । बजेट पुस्तिकमा बजेटको अंक भार तोकिएको छैन ।
    प्रदेशसभा सदस्यका अनुसार प्रत्यक्ष निर्वाचित र समानुपातिक सांसदलाई क्रमशः ३ र १ करोड रुपैयाँ प्रदान गर्ने सहमति भएको छ । मन्त्री लामाका अनुसार वडा समाजवादी कार्यक्रमलाई यस वर्ष पनि निरन्तरता दिइएको बताए ।
    बजेटमा समाजवाद उन्मुख अर्थतन्त्रको अभ्यास स्थानीयस्तरबाट नै गरी प्रदेशको विकासमा गतिशीलता र प्रभावकारिता अभिवृद्धि गर्न भन्दै मानव विकास सूचकांकमा पछाडि फरेका १५ स्थानीय तहका एक÷एक वडामा नमुना वडा समाजवादी कार्यक्रम कार्यान्वयन गर्न १५ करोड विनियोजन गरेको छ । यस कार्यक्रमका लागि अघिल्लो सरकारले समेत बजेट विनियोजन गरको थियो ।