२०८० साल साउन १ गतेको सम्पादकीय

रैथाने बाली संरक्षणमा चासो राखौं
सरकारले परम्परागत तथा रैथाने बालीको संरक्षण र प्रवद्र्धनमा ध्यान पु-याउन सकेको छैन । विगतदेखि अहिलेसम्म धेरैजसो रैथाने जातका बालीहरू हराउँदै गएका छन् । अहिले ९६२ प्रकारका रैथाने जातका कोदो बालीमात्र जीन बैंकमा संरक्षित छ । कर्णाली प्रदेश सरकारले पनि आफ्नै रैथाने बालीको संरक्षण गर्न बिर्सेको छ । नेपालकै रैथाने बाली फापर पनि रसियाबाट आयात भइरहेको छ । पछिल्ला समयमा सरकारले रैथाने र जैविक बालीको संरक्षणका कार्यक्रम ल्याउने आशा गरिएपनि अहिले निराशा उत्पन्न भएको छ । कोदो र फापर जस्ता रैथाने खाद्यबालीलाई आधुनिक खालका खाना, परिकार तथा खाजाका परिकार बनाउने तौर तरिका र विधिका बारेमा तालिम तथा सचेतनामूलक कार्यक्रम दिनुपर्ने छ । अर्गानिक र रैथाने खाद्यबालीलाई नयाँ युवा पुस्ताका खानाका परिकार बनाउन प्रविधि हस्तान्तरण, तालिम, सहुलियत, अनुदान र सचेतनामूलक कार्यक्रम गर्नुपर्ने छ । कृषिको जैविक विविधता, खाद्य तथा पोषण सुरक्षामा जोखिम बढ्दै गएको छ । रैथाने बालीको संरक्षण र प्रवद्र्धन गर्दै खाद्य पोषणतर्फ कृषिलाई अघि बढाउन सरकारी क्षेत्रबाट व्यापक सचेतना, तालिम र बहस आवश्य छ । निजी क्षेत्रसँग सहकार्य गर्दै लोपोन्मुख तथा रैथाने बालीको उत्पादन बढाउन प्रविधि, सीप, बजार र अनुसन्धानमा अझै पनि कमी छ । दिगो विकासको लक्ष्य हासिल गर्न पनि रैथाने बाली तथा कृषिको जैविक विविधतामा जोड दिनुपर्ने विज्ञहरूले नै बताउँदै आएका छन् । तर, सरकारले रैथाने बालीको प्रवद्र्धनमा जोड नदिँदा कतिपय परम्परागत बालीहरू हराउन थालेको छ । पछिल्लो ५ वर्षमा ५० प्रतिशत रैथाने बाली र त्यसको महत्व हराएका छन् । अहिलेको परिवर्तीत समय र फेरिएको खानपान प्रवृत्तिले पनि हाम्रो समाजबाट रैथाने बालीको सँस्कार हराउने अवस्थाको सिर्जना भएको छ ।
    अहिले पनि नीति निर्मातामा रहेकाले रैथाने कृषि बालीका बारेमा ध्यान नदिँदा फापर पनि आयात गर्नुपर्ने बाध्यता रहेको छ । सरकारले नीति बनाउँदा पनि कृषिको जैविक विविधतामा ध्यान नपुर्याउदा रैथाने बाली संकटमा परेको हो । बैंकले पनि कृषिका अन्य क्षेत्रलाई ऋण पत्याउने तर, कोदो खेती गर्छु भन्दा बैंकले ऋण नै नदिने गरेको घटनाकत्ति पटक पटक सार्वजनिक भइसकेको छ । स्थानीय सरकारले पनि कृषि जैविकतामा आधारीत नीति, कार्यक्रम र सहभागीतामा जोड दिनुपर्ने हो । तर त्यसो भएको पायएको छैन । रैथाने बाली उत्पादन गर्ने किसानलाई इन्सेन्टिभ, सब्सिडिटी र पुरस्कार, प्रोत्साहन र पहँुच बढाउने नीति तथा कार्यक्रम अवलम्बन गर्नुपर्ने छ । कृषिमा आधुनिक फार्मिङको अभ्यासले रैथाने र कृषिको जैविक विविधता लोप हुन थालेको हो । प्रकृतिलाई जोगाउने र रैथाने बालीको संरक्षणको हकदार स्थानीय सरकार र स्थानीय किसानकै भूमिका महत्वपूर्ण छ ।
    त्यसो त, धेरै उत्पादन हुने हाईब्रिड बिउबिजनका कारण रैथाने बाली संकटमा परेका हुन् । धान, मकै, गहुँ जस्ता बालीमा हाईब्रिड बिउ प्रयोग गर्न थालिएको छ । अहिलेसम्म कोदो, फापर, जौ आदी भने रैथाने उत्पादन हुँदै आएका छन् । नेपाली भूमिमा उम्रने परम्परागत खाद्य बस्तु, जडीबुटी आदिको नेपाली खानपानलाई रैथाने नेपाली खाना भन्ने गरिएको छ । व्यक्तिको लागि जरुरी हुने पौष्टिकताको अलावा रैथाने नेपाली खानाको औषधीय खाद्यवस्तुको उत्पादन कसरी बढाउने भन्ने चुनौति देखिएको छ । उन्नत जातको बिउको प्रयोगसँगै रैथाने बिउ लोप हुने अवस्थामा पुगेका छन् । रैथाने बिउ लोप हँुदै गएपछि उन्नत जातको बिउले उत्पादन बढी दिने भए पनि विभिन्न खालका रोगकीराले संक्रमण गर्ने, समयमा नपाक्ने लगायतका समस्या आइरहेको छ । पहिलापहिला गाउँघरमा पाइने बिउ आजभोलि पाइनै मुस्किल हुने गरेको छ । उन्नत जातका बिउ स्थानीय हावापानीअनुसार मिल्दोजुल्दो नभएकाले उत्पादनमा समस्या आइरहेको छ । पुरानो बिउमा रोगकीरासँग लड्ने क्षमतासमेत रहेकाले उत्पादन राम्रो हुने र हावापानीसँग मिल्ने भएकाले उन्नतजातको भन्दा स्थानीय बिउ राम्रो मानिन्छ । पुराना तथा रैथाने जातका हरेक खाना मीठो हुने भए पनि उत्पादन कम हुने भएकाले किसानको आकर्षण उन्नत जातमा बढेको छ । उन्नत जातमा उत्पादन बढी भए पनि पुराना जातको जस्तो खानमा स्वादिलो भने हुँदैन । नेपालमा रैथाने बालीलाई जोगाउन सकेमात्रै भोलीका दिनमा राम्रो आम्दानी गर्न सकिन्छ ।
    रैथाने बाली संरक्षणका लागि महत्वपूर्ण कुरा भनेको बिउको संरक्षण गर्नु हो । यसका लागि कृषकलाई प्रोत्साहन गर्नु पर्दछ । यसको महत्व बुझाउनु पर्दछ । बाली उत्पादन भएपछि बजारीकरणको सुनिश्चितता हुनुपर्दछ । रैथाने बालिलाई व्यवसायिक बनाउनु पर्दछ । हरेक जिल्लामा अनेक प्रकारका रैथाने बाली उत्पादन हुने गरेका छन् । तिनको प्रचारप्रसार हुन सकेको छैन । स्थानीय सरकारहरूले रैथाने बाली वृद्धि गर्न अभियान चलाउनु पर्दछ । यसतर्फ किसानलाई प्रोत्साहन गर्नु पर्दछ । लोप हुँदै गएका बाली संरक्षण गर्ने दायित्व स्थानीय सरकारहरूको पनि हो । रैथाने खानाको उपभोग गरेपछि मात्र यसको उत्पादनलाई दिगो विकास गर्न सकिन्छ । त्यसैले रैथाने खाना खाने बानिको विकास गर्न जरुरी छ । अहिलेको नयाँ पुस्ताले आटो ढिडो नै रुचाउँदैनन् वा खान खोज्दैनन् । यसका लगि नेपाली परिकार बनाउन सकिन्छ । शहर बजारतिर रैथाने खाना खाने प्रचलन बढ्दै छ । तर गाउँघरतिर बिस्तारै हराउन थालेको छ । पोषणयुक्त खानाका बारेमा जनचेतना जगाउनु आवश्यकता छ ।