थाई एयरवेजको टुक्रा ३१ वर्षसम्म

फेदीमा प्लेनको सामाग्रीहरूले बनाइएको गेट र सूचना पार्टीहरू । तस्बिर : बद्री प्याकुरेल

दुप्चेश्वर । नुवाकोटको दुप्चेश्वर गाउँपालिका वडा नं. १ घ्याङ्फेदीबाट उकालो लागेपछि सुरु पैदल यात्राको चार घण्टामा पुगिन्छ नुवाकोटको उच्च तहमा रहेको अन्तिम गाउँ ‘तालु’ । तालुबाट अर्को तीन घण्टा उकालो लागेपछि पुग्न सकिन्छ कुनै बेलाको चर्चित हवाई दुर्घटना स्थल घोप्टेभिर । यही घोप्टेभिर आसपासको जंगलमा ३१ वर्ष अघि दुर्घटना भएको थाई एयरवेजको विमानको टुक्राहरू आजभोली पनि असरल्ल पाउन सकिन्छ । यो भिर भन्दा माथी रहेको फेदी भन्ने ठाउँमा केही होटलहरू छन् । जहाँ भने त्यही विमानका सामाग्रीहरूले साइनबोर्डदेखि बाटोमा गेट समेत तयार गरिएको पाइन्छ । अझ विमान दुर्घटना भएको जंगलमा दिवंगत भएका यानत्रुहरूका ‘सग्ला’ कपडा समेत रुख, बुट्यानमा देख्न पाइने रहेछ ।
    सन् १९९२ मा आजकै दिन (जुलाई ३१) मा थाई एयरवेजको विमान नेपालमा दुर्घटना भएको थियो । नुवाकोटको घ्याङफेदीमा भएको एयरबस ए–३२० दुर्घटनामा ११३ जनाको ज्यान गएको थियो । मृत्यु हुनेमा ९९ यात्रु र १४ जना चालक दलका सदस्य थिएर । मानवीय क्षतिका आधारमा यो नेपाली आकाशमा भएको दोस्रो ठूलो दुर्घटना हो । १९९२ सेप्टेम्बर २८ मा पाकिस्तान एयरलाइन्सको जहाज ललितपुरको भट्टेडाँडामा ठोक्किँदा एक सय ६७ जनाको मृत्यु भएको थियो ।
    मानवीय क्षति हुने गरी नेपालमा एक सयभन्दा बढी हवाई दुर्घटना भइसकेका छन् । यी दुर्घटनामा अहिलेसम्म ९ सयभन्दा बढी मानिसको मृत्यु भइसकेको छ । आन्तरिकतर्फका दुर्घटनामा ज्यान गुमाउनेको संख्या करिब साढे ४ सय छ । त्यस्तै, अन्तर्राष्ट्रिय उडान दुर्घटनामा ज्यान गुमाउनको संख्या पनि चार सयभन्दा बढी छ । आन्तरिकतर्फ यती समूहले सञ्चालन गरेका यती एयरलाइन्स र तारा एयरका सबैभन्दा बढी जहाज दुर्घटनामा परेका छन् । अधिकांश दुर्घटनाको कारण प्राविधिक भएको बताइन्छ ।