 |
| जिल्ला प्रशासन कार्यालय नुवाकोटमा भएको परिचय पत्र वितरण कार्यक्रम । |
विदुर । जिल्ला प्रशासन कार्यालय नुवाकोटले राष्ट्रिय परिचयपत्र वितरण सुरु गरेको छ । बागमती प्रदेशमन्त्री, प्रदेशसभा सदस्यको उपस्थितिमा बिहीबार औपरचारिक समारोह आयोजना गरी कार्यालयले सेवाग्राहीलाई राष्ट्रिय परिचयपत्र वितरण थालेको हो ।
बागमती प्रदेश आर्थिक मामिला तथा योजनामन्त्री बहादुरसिंह लामा तामाङ, स्वास्थ्यमन्त्री उत्तम जोशी, प्रदेश सदस्य राधिका तामाङ, जिल्ला समन्वय समिति प्रमुख रजिन्द्रविक्रमसिंह ठकुरीलगायतले परिचयपत्र सेवाग्राहीलाई हस्तान्तरण गरेका थिए ।
आर्थिक मामिला मन्त्री लामा ले राष्ट्रिय परिचयपत्र प्रदान गर्दै मुलुक डिजिटल प्रविधिमा गइरहेको बताए । उनले राष्ट्रिय परिचयपत्रको आधुनिक कार्ड हेर्ने मेसिन पनि छिट्टै ल्याउन आग्रह गरे । राष्ट्रिय परिचयपत्र नुवाकोटमा २०७७ असार ३१ गतेदेखि एउटा स्टेसनबाट सुरु गरिएको थियो । २०७८ चैत १ गतेबाट दुईवटा र २०७९ माघबाट थप गरी ३ वटा स्टेसनबाट काम सञ्चालन गरिएको सहायक प्रमुख जिल्ला अधिकारी वेदनिधि अधिकारीले जानकारी गराए । हालसम्म ४४ हजार विवरण संकलन भइसकेको छ ।
२०८० जेठ १२ गतेबाट परिचयपत्र अभियान टोली म्यागङबाट विवरण दर्ता संकलन थालिएको थियो । दुप्चेश्वर, किस्पाङ, तारकेश्वर गाउँपालिकामा विवरण दर्ता संकलन सकेको छ भने सूर्यगढी र लिखु गाउँपालिकामा विवरण दर्ता संकलन अभियान जारी रहेको प्रमुख जिल्ला अधिकारी किरण थापाले बताए । हालसम्म राष्ट्रिय परिचयपत्र विवरण दर्ता अभियान टोलीबाट २३ हजार ७८१ विवरण संकलन भइसकेको छ ।
No comments:
Post a Comment