ग्यास लिक हुँदा नुवाकोटको लोप्चनको निधन

विदुर । एलपी ग्यास लिक भएर जलेका नुवाकोटका एक युवकको काठमाडौंमा गएको सोमबार उपचारको क्रममा निधन भएको छ । काम गर्ने क्रममा ग्यासको पाइप लिक भएको र त्यसबाट आगलागी भएको बताइएको छ ।  
    कीर्तिपुरको वर्न अस्पतालमा शनिबार भर्ना भएका बेलकोगढी ११ का युवा राजकुमार लोप्चनको गएको सोमबार बिहान उपचारकै क्रममा अस्पतालमा निधन भएको हो । भदौ १६ गते हस्तकला सीसा उद्योगमा काम गर्ने क्रममा सीताश्री ग्यास लिक भएर आगलागी हुँदा राजकुमार घाइते भएका थिए ।
    तारकेश्वर नपा ८ नयाँपुल नजिकै मधुसुदन पाण्डेले सञ्चालन गरेको हस्तकला सीसा उद्योगमा काम गर्ने क्रममा सीताश्री कम्पनीको ग्यास सिलिण्डरको पाइपबाट ग्यास लिक भएर आगलागी भएको थियो ।
    गम्भीर घाइते भएका लोप्चनलाई गएको शनिबार नै कीर्तिपुरस्थित अस्पतालमा पुर्याइएको थियो । लोप्चनको शरिरको झण्डै ७२ प्रतिशत भाग आगोले जलेको बताइएको छ । तीन दिन अस्पतालमा उपचार भएको उनको गएको सोमबार चिकित्सकले निधन भएको जानकारी दिए । मृतक राजकुमार लोप्चनको एक श्रीमती, एक छोरा र एक छोरी रहेको बताइएको छ ।