नुवाकोटमा बजार अनुगमन तिब्र

५० हजार जरिवाना गराइएको माछा पसल ।

विदुर । नुवाकोटमा गुणस्तरहीन वस्तु जफत गरिएको छ । संयुक्त बजार अनुगमन टोलीले मंगलबार अनुमगमनका क्रममा गुणस्तरहीन वस्तु जफत गरेको हो । टोलीले विदुर नगरपालिका वडा नं. २ र ४ मा रहेको बट्टार बजारका विभिन्न किराना तथा मासु पसलको अनुगमन गरेको हो । एकैदिन १० वटा खाद्यान्न तथा मासु र माछा पसल व्यवसायमा अनुगमन गरिएको घरेलु तथा साना उद्योग कार्यालय नुवाकोटले जनाएको छ ।
    १० वटा पसलमा अनुगमन गरिएको कार्यालय प्रमुख किशोर सापकोटाले जानकारी दिए । उनका अनुसार अनुगमनका क्रममा पाँचवटा किराना पसल र पाँचवटा मासु तथा माछा पसल संयुक्त अनुगमन टोलीले अनुगमन गरेको हो । प्रमुख सापकोटाका अनुसार बट्टार बजारको न्यू फिस हाउसलाई  उपभोक्ता संरक्षण ऐन २०७५ को दफा ३९ को ’घ’ बमोजिम ५० हजार रुपैयाँ जरिवानासमेत गरिएको छ । यसका साथै बट्टारकै स्वस्तिक  सप्लायर्समा मापदण्डविपरीत लेवल नभएको ३० किलोग्राम तौलको २४ बोरा ढुटो जफत गरी नष्ट गरिएको सापकोटाले बताए । उनका अनुसार बरामद गरी नष्ट गरिएको ढुटो ३१ हजार २०० रुपैयाँ बराबरको रहेको छ ।