Monday, September 18, 2023

अर्बको सूचीमा बट्टारको पेट्रोल पम्प

बट्टार । सात वटा पेट्रोल पम्प रहेको नुवाकोटका एउटै पम्पले एक अर्ब रुपैयाँ भन्दा बढीको पेट्रोलियम पदार्थ विक्रि गरेको छ । बट्टारमा रहेको भैरवी आयल स्टोरले बितेको आर्थिक बर्षमा एक अर्ब रुपैयाँभन्दा बढीको कारोवार गरेको हो । उक्त आयल स्टोरले एक अर्ब २ करोड ८९ लाख ९२ हजार रुपैयाँको पेट्रोल र डिजेलको कारोवार गरेको नेपाल आयल निगमले जनाएको छ ।
    गत आर्थिक बर्षमा एक अर्ब रुपैयाँभन्दा बढी कारोबार गर्ने पेट्रोल पम्पको संख्या यो सहित १४ पुगेको छ । नेपाल आयल निगमकाअनुसार देशभरको पम्पहरूमध्ये १४ वटा पम्प सर्वाधिक कारोबार गर्ने सूचीमा दरिएको हो । विगतमा इन्धन कारोबारमा प्रहरी, शसस्त्र, सेना र सहकारी पम्पहरूको बाहुल्यता थियो । निगमको तथ्याङ्क अनुसार गत आर्थिक बर्ष २०७९÷८० मा देशभरमै सबैभन्दा बढी धादिङको भैरवी इन्टरप्राइजेजले पेट्रोल र डिजेलको कारोबार गरेको थियो । नेपाल आयल निगमको थानकोटस्थित बागमती प्रादेशिक कार्यालयका प्रमुख शैलेन्द्र भुसालका अनुसार भैरवीले उक्त आर्थिक बर्षमा १ अर्ब ७९ करोड ४० लाख ११ हजार रुपैयाँको पेट्रोल र डिजेल खरिद गरि बिक्री गरेको थियो ।
    भुसालकाअनुसार भैरवी पम्पले गत आर्थिक बर्षमा दैनिक १२ हजार लिटर पेट्रोल र ६० हजार लिटर डिजेल खरिद गरि कारोबार गरेको थियो । त्यो बर्षमा भैरवीले कूल १ करोड ८ लाख ६१ हजार ९५७ लिटर पेट्रोलियम पदार्थ खरिद गरेको थियो ।
    ‘यसमध्ये ८० प्रतिशतका दरले ८७ लाख ५४ हजार ३७ लिटर डिजेल बिक्री गरेको थियो,’ भुसालले भने ।
    देशभर १ हजार ५ सयभन्दा बढी पेट्रोल पम्प सञ्चालनमा छ ।

No comments:

Post a Comment