महिला सिपाही दीक्षित

 महिला सिपाही

बट्टार । बलाधिकृत रथी सरोजप्रताप राणाले श्री नं. १ सैन्य तालिम केन्द्र बट्टारमा २०७९ मंसिर १ गतेबाट सञ्चालन भएको सि.सं. ७८ सैन्य आधार तालिमको गएको सोमवार अन्तिम दलेल कवाजको सलामी ग्रहण तथा निरीक्षण गरी तालिमको समापन गरेका छन् ।
    ९ महिना अवधिको उक्त तालिममा महिला शिक्षार्थी २८९ जनाले सफलतापूर्वक तालिम सम्पन्न गरेका छन् । ९ महिनाको कठोर परिश्रम, लगनशिलता र मिहेनत पश्चात गौरवमय इतिहास बोकेको राष्ट्रिय तथा अन्तर्राष्ट्रिय स्तरमा स्वच्छ छवि बनाएको नेपाली सेना जस्तो गरिमामय संस्थाको सिपाही दर्जामा नियुक्त भएकोमा तालिमे सिपाहीहरूलाई हार्दिक बधाई दिदै आउँदा दिनहरूमा सफल सैनिक जीवनको शुभ–कामना दिए । सैन्य आधार तालिमलाई सफलतापुर्वक सम्पन्न गर्न महत्वपूर्ण भूमिका निर्वाह गर्नु हुने शिक्षक अधिकृत, पदिक तथा बिल्लादारहरू र केन्द्रका केन्द्रपति लगायत सम्पूर्ण सकलदर्जाहरूलाई उनले धन्यवाद समेत दिए ।
    यसै बीच, जबरजंग गण नुवाकोटमा सञ्चालित सैन्य आधार तालिमबाट ९८ जना नेपाली सेनाका सिपाही दीक्षित भएका छन् । गएको सोमबार नै एक कार्यक्रममा उनीहरूलाई मध्यपृतना मुख्यालयका महासेनानी मनोज थापा क्षेत्रीले दीक्षित गर्दै सेवा प्रवेश गराएका हुन् ।
    विदुर नगरपालिकाको देवीघाट ब्यारेकमा नौ महिने तालिम पूरा गरेकाहरूलाई एक समारोहको आयोजना गरेर दीक्षान्त गरिएको हो । सि.सं. १० सैन्य आधार तालिमको दीक्षान्त समारोह सम्पन्न भएको गणका गणपति चिरञ्जीवी पौडेलले जानकारी दिए । कार्यक्रमलाई सम्बोधन गर्दै सहायक रथी थापाले दीक्षितहरूलाई निर्देशन दिदैं राष्ट्रले योग्य व्यक्तिका रुपमा छनौट गरेकाले कार्य क्षेत्रमा खटिदा राष्ट्र, नेपाली जनता र नेपाली सेनाको शिर उच्च राख्ने गरी काम गर्नुपर्ने बताएका छन् ।
    तालिम अवधिभर विभिन्न विधामा उत्कृष्ट हुन सफल भएका सिपाहीलाई महासेनानी थापाले पुरस्कार वितरण गरे ।