हुलाक दिवसमा कर्मचारीहरूको सम्मान

कर्मचारीहरूको सम्मान

विदुर । १४९औँ विश्व हुलाक दिवसको अवसरमा जिल्ला हुलाक कार्यालय नुवाकोटमा कार्यरत कर्मचारीहरूको गएको सोमवार सम्मान गरिएको छ ।
    कार्यालयले खरीदार शंकर ओली, हुलाकी कृष्ण गजुरेल, रामचन्द्र खड्की र ठाकुर तिमल्सिना सम्मान गरेको छ । साथै ८० वर्ष उमेर भएका लामोसमयदेखि कार्यरत अतिरिक्त हुलाकका कर्मचारीहरूलाई सम्मान गरेको हो । कार्य सम्पादनका आधारमा कार्यरत कर्मचारीलाई सम्मान गरिएको कार्यालयका प्रमुख नन्दकिशोर यादवले जानकारी दिए ।
    सूचना प्रविधिको विकाससँगै हुलाक सेवा लिनेको संख्या उल्लेख्य मात्रामा घटेको छ । यद्यपि, सरकारी कामकाज, पत्रिका दर्ताका लागि भने अझै हुलाक सेवाको प्रयोग हुँदै आएको छ । सन् १८७४ अक्टोबर ९ तारिखमा विश्व हुलाक संघ स्थापना भएको दिनको सम्झनामा हरेक वर्ष हुलाक दिवस मनाउने गरिएको छ । नेपालले भने सन् १९७६ मा विश्व हुलाक संघको सदस्यता पाएपछि मात्र हुलाक दिवस मनाउन थालेको हो ।
    यसै बीच, हुलाक कार्यालयले पहिलो सेवाग्राहीलाई सम्मान गरेको छ । टिकट खरीदको लागि कार्यालय पुगेका विदुर नगरपालिका–४ विदुरका श्रीकृष्ण आचार्यलाईसम्मान गरेको हो । हिमालयन एभरेष्ट ईन्स्योरेन्स लिमिटेडका नुवाकोट शाखा प्रमुख रहेका आचार्य कार्यालयको कामले टिकट खरिद गर्न हुलाक पुगेका थिए ।